輸在價錢太快到位 - 方卓如

2015年10月6日 - 信報

有冇睇《火星任務》（The Martian）？鬼佬特別多個人求生片，荒島、帆船、大海全部玩過，而家玩到上火星。鬼佬嘅價值觀就係要戰勝逆境，絕處求生，永不放棄。就算你唔知自己有冇出路，有冇生機，都要諗計捱落去。鬼佬戲統統都話你知捱到最後始終會得救，但唐人戲好多時候係捱到最後差一點點卻失救，製造悲情。價值觀呢樣嘢，你要忠於自己，揀最啱自己嗰隻。

大市用三四日就可以收復一個月嘅跌幅，但亦都係大時代出現嘅新常態，兩三日已經到達要升要跌嘅水平，之後就慢慢消化升幅或跌幅。好多人喺大時代賺唔到錢，唔係佢哋買錯貨，亦唔係貪心唔肯走，就係輸在價錢太快到位，然後慢慢掉頭走。好多人都估唔到大時代咁短癮，咁快玩完，到認清楚原來真係玩完，已經成身蟹貨。而家你見到三四日就升番千幾點，你應該開心定唔開心，視乎你有多少貨在手。

中國票房收入有得發圍

中國經濟下行，香港經濟冇運行，還有邊種行業可以有得發圍？得一行，就係拍戲。而家中國嚟緊可以超越美國嘅，最快就係票房收入。加上中國對荷里活大製作有限額制，唔係套套戲都可以上畫，保護本土製作，等於以前限制土地供應，要睇就要睇國產製作，拍戲先係毋懼經濟下行嘅大生意。

如果你有睇IMAX本招股書，成條電影價值鏈， 最賺錢係放映嗰一截。亦即係話，拍戲呢一行最賺錢都係大業主，有戲院嘅贏最多。拍戲嗰個有風險同傷腦筋，但係放戲嗰個係冇風險，點都有人入嚟睇，仲可以喺戲院賣嘢賺多一截。中國經濟未來大旺電影，鬼佬都見到，所以The Martian都要靠中國火箭幫手救援，又可以喺中國票房多收一點。拍戲都係生意，只要拍得好睇，兩個小時後你就會忘記戲入面是否有啲場面好古怪，票房嘅數字先會永久長存。