第一理想懶到出汁 - 方卓如

2015年10月5日 - 信報

下年度最受注目嘅新車，一定係Tesla部Model X。Elon Musk在台上介紹新車，你就知道原來Steve Jobs式介紹科技產品，唔係個個都學得嚟。Musk介紹到甩甩咳咳，一啲氣勢都冇，但係全靠部車真係有眼前一亮嘅賣點，台下先懂得邊幾個係掌聲位。唔係咁多人可以同時係發明家兼銷售員，Elon Musk親身示範。

Model X其實係車界嘅iPhone，將車玩轉，變成唔止一部車，但係車同電話係有分別。電話本來嘅功用只係通話，iPhone將佢變成隨身電腦，反而通話成為次要功能，唔係咁多人再講電話。車就係用嚟駕駛，駕駛本身係功用兼夾樂趣，加速轉波收油過彎，幾十年嘅汽車改進係要將呢幾個動作變得更易更安全。當你駕駛嘅時候只係變成畀油踩brake扭軚，同揸電車冇分別，先進咗嘅車，反而冇咗駕駛樂趣。

電動車會否全面取代電油車，等於電子錶是否替代了機械錶。電子錶並無淘汰機械錶，識錶之人，要顯示身份之人，都係戴機械錶。機械錶可以係工藝品，可以用嚟欣賞，電子錶未到呢個級數。電動車可以好快，好安全，好慳錢，但係未有電油車嘅玩樂級數。

靠買樓發達過時

不過，當你用到iPhone15嘅時候，你都應該揸緊部電動車。呢個世界唔係咁鍾意保留工藝同樂趣，最緊要係平靚正兼一式一樣嘅efficiency，電動車就係容易倒模嘅未來。調查顯示，年輕人第一理想係買樓，證明呢個城市嘅下一代懶到出汁。買樓等升值，坐喺到印印腳收租，係上一代無端端發達上岸嘅方程式。而家年輕人唔想煩，最好同以前一樣，買層樓就可以過世，咁就一流。上車成為第一理想，相信全世界只有香港獨有。

買樓發達呢招，上一代已經係水尾。點解？鬧首富嗰篇文已經講咗，地產要發達，要有政策配合，唔係你叻就得。你覺得未來嘅政策，仲係唔係想迫地產發達？政策唔鼓勵地產發達，年輕人第一理想，唔單止懶到出汁，而且唔見得有乜前途，令人擔心。