做生意就係造市 - 方卓如

2015年3月5日 - 信報

你有冇見過，恒地（00012）可以一日升兩成？難啲呀呵，成千幾億市值，升兩成唔得了。但係估唔到，市值高過恒地，成二千幾億嘅公司，就做到一日升兩成，呢啲就叫做炒股票喇。

所以話，前輩教落，買股票要買當頭起，要懂得識於微時。愈係買在個頭將起未起時，你愈賺得勁。買啲人人都識，見慣見熟嘅，最多每年等收息，邊有一日升兩成嘅興奮？呢啲機會，今年陸續有嚟，絕對係大時代。

股票經紀可以係式微行業，亦可以係令你發達嘅行業，睇你點做啫。你淨係坐喺到等電話，冇嘢做自己就炒埋一份，賺得幾多？如果你走多兩步，走出去識多啲high net worth，識多啲基金，識多啲上市公司，你主動做到matching，肯定多過你每單收幾滴。行行都係，最緊要用腦，有腦就識得搵路走。行行都係，個個都咁做，點解有人坐私人飛機，有人就返屋企打機？

乜嘢叫做生意？Business is to create a market，做生意就係要製造市場，簡稱造市。市場最緊要係乜？要有地方？要有貨賣？錯！最緊要係人氣，有人買有人賣，人來人往，人馬沓雜，咁先係market。Steve Jobs就係造咗個電話市場，軟硬件都有，連賣電話機殼都搵到餐晏仔，仲唔厲害？喺香港，地產商最叻就係製造market，你呢邊出辣招減少銀行按揭成數，另一邊地產商就提供足額二按，前後做足九成。地價投高啲，抬高麵粉價，麵包自然冇得平。

股票嘅market最難create。股票唔同起樓，地皮有限，但係股票冧把接近無限，供應源源不絕。股票非常liquid，一唔啱玩，散水，以後唔翻轉頭。你夜晚點都要搵瓦遮頭，所以地產有剛性需求，㩒住你搶。股票唔買你唔會瞓唔着覺，所以你會見到好多冇成交嘅股票，好多市盈率單位數嘅股票，就因為股票嘅市場冇被製造起來。