揀磚頭定揀紙 - 方卓如

2015年3月6日 - 信報

《金融時報》記者Roula Khalaf訪問梁麗幗，訪問的結論是參與佔領運動的學生非常幸運，佔領完之後，仲可以做番學生，選擇專心學業，裝備自己，將來更好更具實力地爭取乜乜乜。畀着第二啲國家，示威反對嘅學生，唔係畀軍警一槍打死，就係拉晒去坐監。Roula是國際大報嘅記者，報道過中東非洲，有世界視野，佢應該知道，學生呢種幸運咪就係運動失敗嘅原因囉。

對香港話事嘅唔喺香港，而係喺北京。你喺香港點搞，都動搖唔到話事嘅一條頭髮，更加唔使一槍打瓜你，要唔要坐監仲未知。Roula用幸運嚟形容生於不幸嘅學生，情何以堪。

點到你唔服？漢能（00566）昨天的市值，曾經高過長實（00001）同新地（00016）。就算你有幾十年根基，唔代表幾年貨仔唔可以過你頭，股票就係有呢種快速致富嘅功效。

多贏局面皆因實力

馬雲都曾經有錢過超人，但任你揀，你做邊個？一個喺全世界都有唔同生意，有磚頭有石油，有成隊各方位嘅精英團隊；另一個，手上得一堆紙，同一把好吹得嘅口。畀着你都會揀磚頭，呢個世界兵荒馬亂，唔同地方有實物資產，一定好過一堆唔可以隨便賣嘅紙。財富榜只係計數字，唔理財富質量，首富嘅水分愈嚟愈厲害。

好少一間大市值嘅公司，大股東持股量可以維持接近極限。通常公司愈做愈大，需要資源更多，大股東自然要割愛，讓出部分股份引入資源。馬雲係創辦人，但佔咁細份股份，就係因為過程要忍痛愈搣愈多，否則晨早執笠。

可以搞到幾千億市值，一年賺幾十億，過程唔使點用街外錢，只係在最近大升之前，打折批咗幾個巴仙股票，就做到新股東又贏，舊股東又贏。有冇睇《食神》？呢啲，咪叫power囉。