愈蝕愈要買 - 方卓如

2015年3月11日 - 信報

唔好怪咁多香港人好似喺度擦緊大陸鞋，冇晒尊嚴咁。你睇蘋果，搞場發布會，一開波就西湖分店，內容又大玩WeChat，又要整隻金表等你班無金不歡嘅土豪去搶購。連好地地踏踏實實嘅notebook，都要無端端整部金色。究竟係潮流興金色，還是想引起中國人購買欲，自行判斷。反正成場發布會，sell中國根本係毫無掩飾。同香港唔同嘅係，蘋果擦大陸鞋只係搵錢，唔會影響Tim Cook嘅生活。

但香港，擁抱水貨客，全城着國服，好難唔搞到13歲後生仔雙眼通紅，連阿伯小朋友都唔放過。

改變世界　非賺到盡

蘋果貴為有史以來全世界市值最大嘅公司，P/E只係得嗰15倍，反而中國首富嘅股票，P/E幾十倍。即係話，炒到興高采烈，唔一定見到盈利超級增長嘅，仲多人追捧過改變世界，永遠搞啲新嘢出嚟嘅公司。咁搞法，仲邊有人肯去價值投資？你去價值投資嘅結果，就係落後於人，落後於大市。你等得，畀錢你去投嘅有錢人唔等得。你用價值投資，唔會敢買中國首富嘅股票，但係偏偏唔識價值投資嘅先贏錢。

咁即係話，除非你以後只買樓唔買股票，否則你就要諗番套啱時宜嘅心態。你以前覺得荒謬嘅嘢，而家好多時候已經變咗新常態。例如細價樓可以變呎價最貴樓，P/E5倍可以再跌到P/E4倍，愈蝕嘅公司股價愈堅挺，因為意味非賣殼不可。上市公司而家唔係用嚟做生意，係做deal。邊間做到靚deal，你就要瞓身撲埋去。

香港有咁獨特嘅投資環境，就唔可以學人啲規例。Tesla係上市公司，Elon Musk話事。但你估佢有幾多股票喺手？同散戶差唔多。佢唔會因股價上升變首富，但畀中國人揀，會寧願做首富，唔會揀改變世界。