迫到財仔發達 - 方卓如

2015年2月17日 - 信報

財仔要唔要監管，可能未有迫切性，但財仔成為現在最火紅的生意，是事實。點解財仔從來唔似銀行證券行那樣，有專門的機構服侍監管？只需要問警察攞個牌，放數年息唔過60厘，唔叫做大耳窿，就隨便任借？皆因財仔以前叫貴利，有名有姓，要錢可以問銀行借，唔係最王道嘅融資途徑。

另外攞財仔牌的，本身原意唔係用來做一門獨立嘅生意，係用嚟扶助原本的生意。證券行要做孖展，就攞個財仔牌。手袋值租，攞埋個財仔牌幫師奶押埋個Birkin袋都仲得。直到全世界放水，全世界最唔值錢嘅就係錢，最值錢嘅就係磚頭，銀行又借唔足按揭，財仔喺一個唔需要你降準嘅世界，又唔需要符合《巴塞爾三》嘅要求，只要樓價唔跌，財仔就係最能夠賺盡息差嘅真正生意。

借盡買樓新常態

每個時代都有迫你發達嘅環境，你唔需要聰明才智，落啱注，上啱車，就送你一程。做財仔唔使點用腦，搵到債仔或者畀債仔搵到你就得。年息20厘，即係五年回本。樓價堅挺，最緊要係供應唔夠令成交唔多。喺升市當中，成交唔多，價錢就頂得夠硬淨。而供應唔夠，邊個唔夠力捱唔到利息，一放出嚟或價錢低少少，就即刻有人接。全球放水係大勢所趨，呢個借盡買樓嘅新常態唔會改變。

財仔當然驚呢個升市預期破滅，汽球畀人篤爆。全球放水而港紙升值，計番滙率其實香港樓價再貴多一重。呢個世界有地心吸力，無嘢可以無止境地上升。樓市股市不嬲都係升完爆煲再升過，完成一次又一次嘅財富轉移。財仔唔會係下次爆煲嘅罪魁禍首，佢哋都係畀個環境迫出嚟。