搵條路自己行 - 方卓如

2014年11月26日 - 信報

好多人見到我寫嘅嘢，話我睇得咁灰，其實剛剛相反。識我嘅人，都知我不嬲都非常樂觀，但樂觀嘅人點都會有機會生存喺一個灰嘅世界，你改變唔到事實。問題係，一係你去改變呢個灰嘅世界，一係你喺個灰嘅世界改變生存方法，二揀一。前者可以令你好唔開心，後者可能令你愈來愈開心。唔使咁大陣象迫自己一定要揀一樣，有時候，環境年紀會引導你如何選擇，甚至乎如果你叻仔嘅話，兩者兼得(口添)！

阿爺收番兩個殖民地之後，非常公道，一於兩家都開賭，一人賭一樣，唔好爭。澳門有好多個賭場，間間賺錢，賺多賺少睇你自己造化，駁腳嘅都可以搵番餐晏仔。

香港就得一個賭場，但係就養活咗好多駁腳，分分鐘仲好賺過開賭抽水。呢個大賭場，開始容許跨境落注，畀客仔賭埋另一個賭場，注碼係幾千億淨額，就算擺明係想托錢上去，你做咕喱幫手托錢，唔通你會連碗飯都搵唔到？正如隔籬埠疊碼仔都可以變做大老闆，冇理由喺呢個國際化大賭場，你如果有腦嘅會撈唔掂。

開闊眼光　衝出香港

另外，即然你住得喺香港，眼光真係可以闊少少，胸襟可以打開啲，野心更加可以去盡啲，真係諗樣全世界嘅事業嚟做吓。呢個機會，你而家仲有，將來唔知。趁你而家仲用到Facebook，同外國合作做生意仲未算勾結外國勢力，英文仲未畀上海北京大幅拋離，現在還是好時機。

互聯網時代，創業成本大減，真係揸部手機就開得檔，仲低成本過當年嘅皮包公司。而且呢啲科技嘢，後生仔大把優勢，唔好浪費。

我身邊啲人已經做緊喇，只要做嘅嘢同大賭場有關嘅，個個今年都賺到笑。肯衝出香港胸懷世界嘅，直情去外國攞獎喇。有冇睇《Interstellar》呀？地球唔掂，去外太空咁渺茫都要搵路行。你覺得香港唔係好對路，都要快手搵條路畀自己行，仲等？