後佔領後遺症 - 方卓如

2014年11月27日 - 信報

後佔領時代，等我哋數吓有幾多創傷後遺症。

政府咁鍾意講法治，就先講法治。我以為法治應該係用法律限制當權者如何使用權力，所以強如普京都要做幾年總理，過吓冷河，先可以再做總統。但港式法治係搵吓邊條法例用得着，去合理化執行權力，冇一條啱，就用條近似嘅再去講到啱。這兩年已經有好多偷換概念嘅歪理拋出市面，而家玩到去法治呢個層次，連法治仲係唔係貨真價實定語言偽術都叫人要諗一大餐，基本上搞到香港冇嘢再信得過。民無信不立，一個城市可以對任何嘢都質疑的話，內耗幾勁？今次用禁制令來包裝清場，成本之高係你想像唔到。

十幾歲學生，睇唔過眼，着住校服走出嚟，戴晒口罩面罩，要舒口氣。政府製造了一代敵視警察的年輕人。佢哋眼中嘅警察，手戴鋼片手套，腰纏胡椒噴霧，見學生就揼，遇學生就查，將年輕人眼中的警察塑造成雙眼滿布血絲的打手。我哋老喇，冇幾多年玩，年輕人幾十年流流長，活在仇視警察的世界，兩邊都慘。

搵年輕人溝淡你

宗主國見到年輕一代咁麻煩，只有兩個對付方法。一係學四五十年前咁，搞啲舞會，等你掛住溝女唔得閒。一係學四五年前咁，搵另一班年輕人換鬼晒你哋，趕你哋走。可能我身處嘅行業係最搵到錢同門口大開嘅一行，如果你見到，你都會問：「啲香港年輕人去晒邊度？」嚇死你，唔見晒，你會以為佢哋一畢業就上岸。香港嘅移民政策唔係自己話事，要搵年輕人溝稀你，容乜易。疑似特首候選人話要關注年輕人，但將來年輕人機會係多咗定少咗，我估佢哋都心知肚明。

後佔領時代，就好似揭起咗張內藏老鼠曱甴嘅地毯，所有唔見得人嘅嘢揚晒出嚟，問題可能由來已久，但揭起嚟嗰個又搞唔番掂嘅，冇辦法，就係罪魁禍首。