玩樂主義主導 - 方卓如

2014年11月5日 - 信報

都話香港人易管，有得食有得玩就搞掂。你睇，美酒佳餚搬到啟德咁遠，都爆到叫你唔好再去。日圓狂跌，第一時間唔係諗有乜投資路數，而係去日本平咁多，嗱嗱林訂機票去疏乎。玩樂主義仍然係香港主流意識，邊個唔想玩，寧願走去瞓街？所以係咁叫人返屋企嘅知識分子，你唔先叫政府反省吓，枉你讀咁多書。

北京難得清新空氣，藍天無雲，但我聞到一陣陣肅殺味道，香港人好快無得再玩樂主義，好快唔止無得玩，直情無嘢做。而家話事嗰班五六十歲嘅人，其實全部為咗自己搵埋最後一浸，犧牲扼殺晒香港年輕人嘅前路，佢哋想爭氣都無機會。

內地市場龐大，香港無嘢會令內地人睇得上眼，惟獨係香港這個國際金融中心，市場夠大，而且內地無。將這個金融中心變成由內地揸弗，咁就真係唔怕你佔中。上海取代香港？如果香港金融市場變成自己控制，談唔上取代唔取代。嗰啲權貴成日恐嚇香港人，叫你醒醒定定，唔係就會被上海追上，唔係欺騙就必定係白癡。

香港人被趕落車

當香港變成香港人無份嘅時候，追上唔追上又有乜嘢關係？你架法拉利畀架林寶追上，但原來你已經畀人趕落車，都唔再關你事。

慘唔慘？而家唔係講香港會點點點，係要講香港人會點點點。我一早都話，香港唔會死，但香港人就會死得好慘。後佔領時代令香港人更加自覺自身利益如何受損害，一樣都係玩樂主義主導，但會叫人睇清楚社會變化如何令你無得再玩樂，或玩樂得無咁開心。

香港人愈來愈慘，受害最深的，梗係年輕人，所以佢哋咁㷫，瞓街都要同你死過，無實質成果唔會收貨，係有佢哋嘅道理。政府一係睬佢哋，一係就打殘佢哋，無中間、無得當無事發生過。歷史上好多social unrest，都係農民身無長物反抗壓榨的大地主。而家香港就係一班本來可以手上有嘢，但即將畀人搶晒、而家要群起反抗嘅年輕人。

權貴你真係想香港人好嘅，唔該你勸吓政府，同埋唔好做咁多嘢趕香港人落車。