錢搵錢都唔夠人叻 - 方卓如

2014年6月4日 - 信報

老早講過上市公司老闆是萬能，但如果這位是一名內地的上市公司老闆，更加是萬能再萬能，做到好多香港人冇辦法做到的角色。

內地人融資點子高超

他們個個都一定是國策專家，冇一個香港人及得上佢哋一半。香港人都努力學習國策，知道如果唔知國家未來點走，自己會死得好快。但香港人知道的只是字面，再叻，你識得幾個官，可能會多一點解說。不過，你永遠改變不了的是，你永遠是外人。外人意思就是最內線的事情你不會知道。字面上你稔熟國策，你絕對夠資格打去電台做一個中國問題專家。但做生意是捲起衫袖埋身肉搏的血戰，你要知道的國策是實實在在有幾多路數。靠睇字面扮專家，十條命都唔夠死。

他們必定都是融資專家，這個是必然。做生意找融資是天經地義，香港人都識。但內地人融資的點子，香港人未到他們水平一半。香港人槓桿買樓是天下第一，養成銀行最叻是睇磚頭，其他抵押品六親不認。內地人去融資，門路四方八面，抵押千奇百怪，最緊要，債主知道點樣收數。

一個借錢還錢再借錢的生態環境，香港人是打不進去。你會覺得咁貴利息邊個會借，同時又會問咁貴利息邊個還得起。但就是有這個瘋狂的生態，才有瘋狂的以小博大的機會。香港人就算幾進取，都接受唔到博到咁盡的心態。香港的老闆見過內地行家的行為，會覺得自己其實好似打份工，保守到暈。

樓市獨旺損搵錢能力

他們是21世紀資本主義的代表，是看準機會以錢搵錢的表表者。本來這是香港人的強項，但樓市獨旺，香港人已經不用傷腦筋如何融資。連錢搵錢的能力都喪失了，點同人鬥？25年原來過得好快，25年後我都可能瓜老襯。唔好浪費時間，要做好做，有食好食。