死做爛做死梗 - 方卓如

2014年5月27日 - 信報

有報道說隨着中美罵戰升級，中國政府下令國企不能夠聘請美國顧問公司。繼會計師之後，又有一行有可能因為行政命令失去一個超大市場。不要看輕一道行政命令，隨時令千萬人多年心血化為烏有。

港人開會總會鵪鶉點

只有兩類公司能夠在中國生存，第一類當然是國企；第二類是絕頂總明可以壟斷市場的民企，其他就算你係國際大企業，一樣可以蝕到你驚。

中國的商業戰場，無論你是老闆還是打工，你先天就是劣勢。老闆以前講過，今次講打工。就算你是在一間外資企業，講制度的大企業打工，在制度之下，要扶搖直上，你總唔夠內地人快。內地人眼中，他們是一群狼，而你是一隻綿羊，一隻諗住在制度之下乖乖做好本份的綿羊。而狼，是要在制度並不禁止之下，千方百計咬死這批羊，然後踩住上。開會的時候，狼總會想到幾句說話，要表現自己有主見，有諗頭，又敢言。雖然，他們講多過做，到真正要做的時候，總要打個四折。但咪理，總之在老細面前，佢哋就係令人有印象的一群。

反之，香港人，開會總會鵪鶉一點，大概可能是國語麻麻地，又或者自細已經被培養了一種「我雖然想挺身而出，但最後選擇了沉默」的高尚情操，開會時總是耷低頭，驚死點名叫自己發言，甚至有時會玩手機。你以為，在良好制度之下，能者居之，只要你默默將份內事做好，勤力又肯蝕底開OT，老細總會睇住你的。

香港係綿羊生存之地

但大自然規律，狼永遠在食物鏈中騎在綿羊之上，就係食住你。吹水王雖然做唔到嘢，但總有一群揼石仔的幫佢搞掂。老細要升職，二揀一，冇辦法，一定揀吹水王。你幾時見過CEO走出嚟是一隻鵪鶉？吹水就是做最大嗰個的天賦本錢。你北上發展，仲用緊香港嗰套死做爛做？對唔住，綿羊好少喺野外生活，等人餵的香港先係綿羊生存之地。