2014年6月17日 - 信報
林少陽出書，絕對毋須推介，因為市場上有料之人唔多，而有料又識寫字嘅，更少。有料又識寫字，兼且肯花時間寫低同人分享，更加少過依家香港夠膽講良心話的人。林少陽出書，點會唔大賣。是我乞求讓我可以寫序，畀機會我叨光，同時等人知道我未死。
林少陽將價值投資法進一步煉成催化劑投資法，是將專業行內的秘訣公諸於世。所有專業投資者睇一隻股票的時候，都會問自己或對方一條問題：有乜催化劑。價值投資法講求公司要有盈利，用一盤生意的心態去買股票。在二三十年前，世界簡單得多，大家專心做生意的年代，資訊又唔發達，價值投資其實是用方法走先市場一步掌握公司情況，等於合法地用腦筋猜出內幕消息，用呢個方法贏錢。
但今日，資訊多過籠，唔值錢。真正值錢的資訊，是內幕消息，唔用得。靠睇年報分析公司買股票，out到爆，輸死人。專業人士要買股票，就是睇有什麼催化劑。有催化劑，股票就可以升。催化劑夠力夠持久，股價長升長有。
催化劑唔易睇得出。以前公司年報都是專業人士專門讀物，但十年前經過一輪大眾媒體教導，有正常閱讀能力的人都可以睇得出一個大概，但這麼多年來，沒有人教過如何睇催化劑。林少陽將催化劑分門別類，一五一十向讀者介紹，是繼十年前有人教投資者睇年報後的另一浪提升投資功力熱潮。
除非未來十年人類已經不再參與投資，全部交給電腦代勞。否則的話，催化劑投資法，應該是人類用腦投資的終極思考模式。我唔想林少陽這本書大賣，甚至乎我想本書唔好攞出嚟賣，因為多人識睇催化劑，表示市面上平貨愈來愈少。並非太多人會肯教精人，我一定唔會。
（本文是林少陽新作《催化劑投資法》之推薦序）
沒有留言:
發佈留言