識得多輸得愈多 - 方卓如

2014年6月18日 - 信報

人類十大發明，我會話股票必定是十大之首。股票能夠有秩序地轉移財富，亦可以將財富傳給下一代。識做生意而唔鑽研股票，是懶惰，要好好教育。

搵股票催化劑

昨天我寫林少陽系統整理的催化劑投資法，有人打嚟問有冇更深層次啟示。Well，我師傅講得好，世界上有本事有諗法的人千千萬萬，最後企得起身仲可以也文也武的，佢就係師傅。佢之前可能死了一萬個師傅，但唔緊要，冇人會記得，只有最後一個，才會萬人景仰，受人追捧。

價值投資依然用得着，只不過平民百姓的你，是永遠不能夠發掘真正價值。平民百姓用價值投資賺到錢，唔係你叻，係你好彩。我可以近距離觀察過一些公司，望到它們的真正價值。我敢講，平民百姓冇可能睇得出真正價值。如果業餘人士在家裏拿着本年報揭吓揭吓，做功課，準備明日落盤，作為興趣，課餘活動，放工後搵些細藝，無妨。如果你認真，以為識睇，掂！仲畀你開始贏錢，咁就弊！分分鐘輸身家。股市專收叻仔就是這個意思，你以為識睇，其實你跟本睇唔到。

咁點搞？搵催化劑就最啱，因為叫得催化劑，就知佢唔last得耐。唔last得耐嘅，你會如履薄冰，日日(目及)到實。今日覺得啱嘅，你會接受明天可能唔啱，因為催化劑會突然唔見。價值畀人感覺恒常持久，催化劑就個個知要走鬼。專注催化劑，是概念的改變，對平民百姓功德無量。

股市專收叻仔

催化劑還可以幫大家避過過去一世紀地球最大騙局，市盈率種在平民百姓腦中，個個知啲唔知啲，害死人。市盈率低，你覺得抵，買，佢可以再低。市盈率高，你沽，佢仲可以升。最慘係過去十大升幅股，可能有一半是零利潤，市盈率負數。你有學識，識計市盈率，避開這類冇價值股票，反而佢哋股價最升值。你唔明，點解自己咁醒會輸錢？