唔好畀人睇穿 - 方卓如

2014年6月27日 - 信報

蘇亞雷斯要停9場，4個月禁止參與足球活動，睇怕噚日佢應該喊到收唔到聲。講真，比賽時咁緊張，意大利人貼得咁緊，阻頭阻勢，係人都想打鑊佢。如果哨牙蘇唔係天生有過人之處，只係學正常人一樣批踭，應該冇罰得咁重。

唔怕，每個超級足球巨星身上都有神器，馬勒當拿有上帝之手，施丹有愛心頭槌，蘇亞雷斯有鐵齒銅牙，就算佢永遠攞唔到世界盃，佢個名都會永遠長存世界盃。

書本透露個性

辦公室入面，最容易暴露你是什麼人的東西，是書本。好少人會在辦公室睇書，有時間睇書，你都想快啲走，返屋企慢慢睇。而且當今年代，莫講話唔多人睇書，就算睇，都睇電子版。喺辦公室畀你咁難得見到有書係度，這本書的來歷當然是有點故事。

能夠出現在辦公室的書，10本有7本都是人哋送。自己買的，點解唔攞返屋企慢慢睇？人家送的，你又冇興趣，自然放喺公司。辦公室永遠是垃圾崗第一位，唔睇嘅書，放喺辦公室最啱。送本書畀你的那個人，只會送兩類書，一是他自己寫嘅書，二是他認為你用得着（即是你唔識）的書。你入到一間辦公室，就知主人識啲乜嘢朋友，同埋朋友眼中他有什麼必須惡補。送書咁文雅嘅事情，點知原來最容易出賣你朋友。

如果本書是自己買的，更容易露底。你放得在辦公室的書，絕大機會是在你午飯時間，無無聊聊在逛書局時買的。午飯時間咁短，你走去望兩眼都會肯買的書，一係你衷心喜歡的，一係你趕住要用的，例如旅遊天書。你入到人哋嘅辦公室，見到他喜歡什麼，要做什麼，仲唔睇穿呢個人？

下次有人要入你房傾嘢，你第一時間唔係要執好張枱，唔係擺開你枱頭那幅在大陸飲酒時影的相，是嗱嗱聲遮住你書架上的書，搵幾本Economist放喺面就得。