符符碌碌，就到終點 - 方卓如

2014年6月25日 - 信報

蘋果有千幾億現金喺手，收購買嘢據聞會更加爽手。美國的公司同香港的公司最大的分別是，前者收購買嘢數現金出嚟毫不手軟；而後者，一定印呢樣，印嗰樣，免得過用現金死都唔會用。點解？

唔使什麼聰明智慧，用常識都估到。你出去同人換嘢，梗係想用自己最唔值錢的東西換人哋最值錢的東西，自古中外，生意就係咁做。在美國人尤其是科技公司，現金好似唔使錢一樣，每日源源不絕送上落袋。

派息佢哋唔會，因為佢哋覺得股東用錢冇自己咁醒。你唔派息，自然要諗計用咗佢，買嘢最直接，一張一張數畀佢。

仲有，搞科技公司的，除了Larry Ellison之外，其他大部分都唔志在錢。大佬，佢哋個個做緊改變人類生活的事情，雙眼通紅，最好一日有30小時，等佢哋盡快可以實現心中理想。莫講話佢哋冇時間使錢，就算有，佢哋想要的錢都買唔到，因為佢哋仲未發明。綜合而言，要佢哋用唔多值錢的錢去買嘢收購，求之不得。

印股票必有原因

掉番轉，香港公司就冇咁疏爽。好多公司都係比較手緊，耐唔耐都要供股集資。用錢買嘢收購？難啲，自己都唔係點夠使，點可以數cash？搣股票唔一定冇問題，因為打散了大股東的股份，唔一定肯制。不過，以香港的觀念，股票係紙，今日印多咗搣崩咗，下次可以供番齊。而喺公司的現金，同喺自己袋無乜分別。所以，要買嘢，印嘢。知道乜嘢對公司最值錢，就睇到公司買嘢是什麼心態。印股票或畀現金，一定有原因，唔會無緣無故。

巴西踢波毫無隊形，好似成班細路喺度踢波，高危。但唔代表攞唔到冠軍，過去幾屆，冠軍都唔係最有霸氣嗰隊。同做人一樣，有時符符碌碌就到終點。