入會做上市公司 - 方卓如

2014年5月12日 - 信報

上市公司作為入會費最貴的俱樂部，要做會員，即是做上市公司老闆，一啲都唔容易，需要多種技術集於一身，缺一不可。

上市公司有上市公司自己一盤生意，本來做生意已經可以窮一個人一生精力，變成上市公司，如果唔想分心令生意下滑，就要掉番轉用多一倍精力。即是說，上市公司老闆是要一份糧打兩份工，雖然份糧應該可以豐厚好多。

要懂法律　要識炒股

上市公司最煩的是，有好多規例要守，呢樣唔做得嗰樣又唔講得，要將自己化身為半個律師。做生意本身已經要懂一點法律，但做生意的法律主要是為搵錢。

上市公司的法律，是避免自己要坐監，兩者非常唔同。上市公司老闆心理壓力極大，經常恐防自己一個唔覺意行差踏錯惹麻煩。

做生意，不時會有人上門摟你合作，上市公司老闆多了一種人會摟。那種人會摟你搞股票、炒股票、批股票。來者什麼人都有，條款各有不同。上市公司老闆，開首可能會嫌煩，聽完算數，專心做生意。但久而久之，會想，「咁辛苦上市，唔搞股票，不如唔好上。」這時候，上市公司老闆要搖身變成一個銀行家兼股票經紀。通常做生意的都會買點股票，但到自己印股票，又是另一種學問。他要知道各種工具的作用，更要睇穿來者的真正用意。殺頭生意有人做，來者肯陪你殺頭，一定有佢搵錢的方法。上市公司老闆是否可以極速練成銀行家與股票經紀的武功，看個人造化。通常，練成功的老闆，功力厲害過任何銀行家。

但上市公司老闆最厭惡的工作，是撲水。生意愈大，要錢愈多，任何做生意的人都有撲水的經歷。但唔知點解，上市公司用水特別多，經常要撲。上市公司借錢較為容易，大股東手上有股要，要借更易。

不過，這是雙刃劍。一借，就踏上債冚債的循環。當你踏入撲水階段，通常你已經冇精力再做盤生意，每日都是計住條數點還，點樣再借。這時候，你會轉型，變成上市公司的trader，一買一賣，賺得比做生意更多。

回頭一望，你知道，你已經神功練成，你轉行做了上市公司生意，恭喜恭喜。