香港最弊冇人 - 方卓如

2014年5月22日 - 信報

是但台成日被人詬病，劇集不堪入目；反而韓劇英劇美劇，劇劇精采，佳作層出不窮。相比之下，是但台之不思進取，執咗佢好過。

與蓋特納午膳

《金融時報》每星期都有一版「lunch with the FT」，最新一期與美國前財長蓋特納午餐。蓋特納最近有新書出版，自然成為話題。同樣的「與xx午膳」，香港媒體都有樣學樣，訪問者都是有料之人，訪問內容算是有睇頭，不會問一些無聊問題例如「你對後市點睇？」「幾歲賺到第一桶金？」「你會唔會選特首？」等等。不過，級數與FT還是差一截，你自己可以比較一下。何解？

同是但台唔爭氣一樣，大家層次唔同，冇得比較。FT唔係畀一個城市的人睇，全世界的人都是讀者群，而且還是最top嗰批。因為服務全世界，為其效命的同樣是全世界的人。他們找到的被訪對象，可以是世界精英。千錘百煉一個世界尖子放在面前被你訪問，你簡單一句「食咗飯未」，已經可以引發一連串答案，由中俄天然氣合作，巴爾幹半島沖走地雷，講到巴西足球場未有上蓋就要世界盃開波。有訪問經驗的人會知，一個精英放在你面前，雖然你唔會問到你的刁鑽問題，但肯定訪問內容會是扎實精采，夠晒睇頭。

對呀，層次唔同，因為香港冇人。莫說世界級數，一個夠膽在鏡頭面前講人話的人，香港隨時數唔出五個。要訪問一個講假話講得唔精采的廢人，又怎會引人入勝？

電視劇一樣，如果你知道你的作品要面對全世界，你更厚面皮，都會度出一套全世界都會睇得明，睇得入神的作品。如果你知道只會有一班肯留在屋企睇電視的師奶，又或者在iPad追看重播的宅女宅男欣賞，而他們平日書都唔睇多本，你都會是是但但，求其整一套嘻嘻哈哈的20集搞掂收工。

有水準都要識欣賞

情形就似壽司之神，嘔心瀝血摙幾件壽司過你，奧巴馬（口趙）到一半已經停手，又或者偉大強國人，膽敢叫壽司之神整舊熟魚出嚟食，面對如此對象，你都會是是但但，好又一餐，唔好又一餐。