「容易的樂趣」（easy pleasure） VS 「困難的樂趣」（difficult pleasure） - 占飛

2011年6月22日 - 信報

尋樂捨易取難　才夠滿足

這是個「最緊要好玩」的世界，學嘢要講愉快學習，玩嘢要講快樂抗爭，總之不管做什麼，都不可違反心理學大師佛洛依德（Sigmund Freud）所講嘅快感原則（pleasure principle）。社會充斥着唾手可得的「容易的樂趣」（easy pleasure），愈來愈少人識得欣賞要大費周章，搜索枯腸去搵所謂嘅「困難的樂趣」（difficult pleasure）。

何謂唾手可得嘅「容易的樂趣」？只要你消費得起，頂多加一點耐性，遲早必能擁有最新型號的iPhone和iPad。超級市場和百貨公司嘅貨品應有盡有，你睇中什麼，攞去收銀機畀錢，即刻可以據為己有。還有為你提供視聽之娛嘅大眾娛樂工業，滿足你口腹之欲嘅大小食肆，以及讓你隨時隨地與世界保持聯繫嘅互聯網和社交網站，皆確保各式各樣「容易的樂趣」供應源源不絕。

問題是「容易的樂趣」實在太容易，它們在為城市人提供即時滿足嘅同時，也削弱了他們欲望嘅熾烈以及享受樂趣嘅能力。當整個社會泛濫着消費信息，當你嘅佔有欲時時刻刻都被刺激和誘惑，你嘅欲望無可避免被攤薄和稀釋。我們不再懂得「衣帶漸寬終不悔，為伊消得人憔悴」，只學會「人到情多情轉薄」。我們不會死去活來地渴求得到一樣東西，只會漫不經心地希望得到一百樣東西。

只滿足於擁有工具

由於不會牽腸掛肚地渴望得到任何東西，我們已經無法經驗和體會到欲望得到真正滿足的樂趣。舉個例，Kindle、iPad和iPhone嘅發明，的確大大提升咗閱讀嘅方便；但它們只是閱讀嘅工具，怎樣使用它們，還是取決於我們自己嘅意志與欲望。實情是現代人雖然有愈來愈先進嘅閱讀工具，但閱讀嘅意志始終無法堅強起來，更遑論閱讀嘅欲望，現代人根本就無法將閱讀和欲望聯想在一起。喜歡上網、打機和睇戲嘅人不僅不會知道閱讀的好，就連進入閱讀嘅狀態可能也有困難。只要花得起錢，今天你可以在市場買到最先進嘅電子閱讀器；但你得到嘅只是擁有閱讀工具的easy pleasure，而非從閱讀取得嘅 difficult pleasure。

使錢享樂悶死人

真正嘅樂趣往往是困難嘅樂趣。為了要得到最深刻嘅愉悅和滿足，我們有時不得不放棄很多細微、短暫和膚淺嘅樂趣。對很多人來說，跑渣打馬拉松喺攞苦嚟辛，但挑戰自己體能極限嘅那份滿足感，又豈是攤在梳化上煲韓劇可比？香港人最需要嘅，可能喺一種由強烈欲望驅動嘅激進享樂主義，以取代一味鼓勵人使錢嘅消費主義和驚死悶親人嘅膚淺享樂主義。

早前，三名拔萃女書院的學生，在「國際學生創新挑戰賽2011」中獲獎，因為她們諗到將沉悶的《論語》讀經班包裝成不同單元，又在每個單元加插角色扮演和小故事等環節。創意的確可嘉，但這不就是將讀經典的difficult pleasure降格為好玩的easy pleasure的典型例子嗎？