underdog之年，扒冷 - 方卓如

2016年9月27日 - 信報

今日星期二早上係美國總統選舉電視辯論，一定係有史以來全球收視最高嘅辯論。選舉都係show business，要贏就要多觀眾，觀眾喜歡邊個多啲，邊個就贏。明明希拉莉比特朗普更勝任做總統，點解後者嘅momentum愈嚟愈勁，直追前者？因為響呢套選戰連續劇入面，特朗普娛樂性更加豐富，襟睇好多。希拉莉係舊人，選過，四平八穩，即係悶。兩者一泊埋，每一次同場較量，特朗普都攞分。

雖然2016年就快完，唔好忘記，今年係underdog之年，所有最終勝利嘅，都唔係傳統熱門。年中前我已經講過，最近嘅例子包括葡萄牙贏歐國盃冠軍、中國女排攞奧運金牌、立法會選舉嘅票王係之前估佢選唔到嗰個。Underdog之年，特朗普要贏，有乜咁奇？今日嘅辯論，如果希拉莉唔可以KO特朗普，即係輸。萬一希拉莉激氣得滯突然病發，可以有餘生嘅時間專心養病。

Underdog之年，扒冷，還見於投資市場。今年年頭個個叫你唔好買樓，到頭來，年頭買樓年尾你已經贏。

低息環境係長期，全球央行係永遠放水。大部分人除咗買樓之外，係冇第二個儲存財富嘅方法。面對銀紙愈嚟愈唔值錢，唔買樓，仲可以做乜？富有富買，窮有窮買。有錢嘅可以高價投地，接近冇利息成本嘅環境下，買樓可謂冇壓力。

唔買樓仲可以做乜

窮嘅，車位同樓體貼地讓你可以去借平錢，享受印銀紙嘅樂趣。點解廁所閂唔到門嘅樓都有人買？因為冇廁所嘅劏房仲有人租嚟住，高級劏房，讓享受印銀紙唔再係有錢人專利，排隊買樓係應份。將來銀紙再唔值錢，窮人可能慶幸購入了車位同樓。

香港正在步東京後塵。買樓可能係三代人嘅事， 老豆畀首期，個仔負責供，個孫出世嘅時候要加按。銀行有債務收唔番，以股代債，大家都是對方股東，互控，冇人要執笠，亦冇人有翻生機會。人工停滯不前，除咗買樓大家都唔敢使錢，經濟半死不活。港元美元掛鈎，經濟唔好，滙率都要跟美國升，等於當年日本泡沫爆破後，日圓反而持續升值，搞到而家都救唔番。歷史經常重演，只係場地可以替換。