以前啱嘅而家未必 - 方卓如

2015年10月28日 - 信報

世衞公布原來港式早餐係致癌元兇，呢鋪全香港嘅媽咪先係最頭痛。𡃁仔嘅早餐唔係火腿就係腸仔，你叫啲媽咪以後每朝都餵啲致癌物畀啲細路食，情何以堪？媽咪可以唔畀食鹹魚、唔准食皮蛋，但係火腿腸仔？呢劑仲大鑊過TSA。

我哋唔好成日畀啲洗腦嘅概念影響，例如經濟衰退，唔一定生活水平下降，尤其係而家有最低工資，走去洗碗人工仲高過大學畢業生，你想市面上啲價錢平啲，好過自己搵多啲。所以話，而家到咗望樓價跌、唔好望自己發達嘅年代，因為冇咗買樓發達呢招之後，基本上好多人已經冇咗發達嘅門路。

有人話樓價跌都冇用，樓價愈跌你愈唔敢買。唔係話買樓要量力而為咩？只要供得起自用嘅，就可以買咩？唔係話炒家已經絕跡咩？樓價跌到負擔得起嘅水平，要住嘅自然要買。以前環境未穩，供樓十幾厘息，樓價跌代表你都唔得掂，樓價升就等於你發咗達。而家最唔值錢就係銀紙，有層樓揸手隨時可以再借錢，老咗仲可以逆按揭養老，老虎蟹都望樓價跌，唔跌你邊買得起？

經濟差不代表生活差

經濟衰退唔代表生活質素下降，你睇吓日本，經濟半死不活廿年，你覺得日本人生活得好淒涼咩？我覺得佢哋生活得好有質素，唔係要豪客式瘋狂購物、唔買就打一身先叫生活質素。要豪嘅，日本三星嘅餐廳，30分鐘要你食完走人嘅壽司之神，都係每個月第一日已經收滿下個月嘅訂枱，勁過香港嘅三星餐廳。最貴嘅嘢有，最好嘅嘢有，唔使講錢但有質素嘅嘢都有，經濟衰退有什麼恐怖？發達嘅城市應該脫離盲目追求GDP數字增長，增長唔代表市民可以提升生活質素，而好多生活質素嘅提高，好多時候都唔使錢，例如假日你去郊野公園，同小朋友行山。

你自細耳濡目染嘅概念，其實害咗你一世。你有冇腦自己去諗吓，有冇膽去行條唔同嘅路？