從未瘋狂最錯 - 方卓如

2015年10月19日 - 信報

賽車係一項危險嘅運動，隨時威脅性命。電單車賽車仲要危險幾倍，三百幾公里跌車，斷骨已經叫輕傷。MotoGP，電單車嘅方程式賽車，鬥剩兩站，下站喺馬來西亞。六屆MotoGP冠軍，意大利人羅斯排第一，領先第二位11分。識睇MotoGP嘅人都知，十一分濕濕碎，一場比賽第一名同第四名已經相差十二分，羅斯仲未贏梗。好多人想佢贏，擁躉特別多，除咗佢攞得冠軍多，佢啲頭盔戰衣零舍靚過人之外，仲有係佢已經36歲，老將，就嚟收山。

passion不足為外人道

昨日MotoGP澳洲站，是少有的精采比賽。唔好見條跑道咁闊，電單車咁細，一定係大把位畀你爬頭。錯！電單車係跑道上有條入彎嘅線位，要喺直路鍊盡，彎前狂brake入彎，高速逃離彎心，全部車手都係行緊同一條線。最近有套電單車紀錄片，叫Hitting the Apex，攻入彎心，就係電單車手每個圈都要做到零錯誤兼最快速度嘅動作。換言之，跑道雖闊，但可供行走嘅只係其中一條線，要爬頭就要睇啱機會加油，盡快入番最佳線道。澳洲站最後一圈，頭四位接連互相爬頭，今年最緊張嘅一次冠軍爭奪。羅斯第四，畀第二位追近七分，未來兩站定勝負。

電單車要爬頭，過彎就要攝位、攝內線。電單車過彎唔係扭軚，係兩邊壓車。電單車條軚是尖的，兩邊傾側，就好似將玻璃杯橫放向前推，佢會打轉而唔係直線向前行。電單車攝內線爬頭，你對手冇位壓低部車，就畀你快速過彎離去。每次過彎車手要頂住1.6G嘅G force，36歲依然爭緊冠軍，難怪咁多人追捧佢。

Hitting the Apex講6位電單車手，4個現役，一個退休，一個比賽中身亡。意外發生之地正是下一站馬來西亞。呢套紀錄片，同所有運動有關嘅電影主要訊息都一樣，你唔好問點解有人會願意做咁危險嘅動作，passion呢樣嘢係不足為外人道。所以無論爬珠峰，世貿中心行鋼線，時速300公里跑電單車，外人眼中嘅瘋狂行徑，喺有passion嘅人心中是理所當然。

香港人嘅passion只係買樓發達，難怪會睇好多人唔順眼，覺得佢哋行為瘋狂。同樣地，喺有另類passion嘅人眼中，只顧買樓嘅亦都係瘋狂行動。無話邊個啱邊個錯，最錯係你一啲passion都冇，從未瘋狂。