要夠薑行出第一步 - 方卓如

2015年10月12日 - 信報

而家嘅後生仔，佢哋嘅成功機會比我哋呢一代大好多。點解？Well，首先要學李天命式語理分析，定義乜嘢叫做成功先得，咁就可以任我講，你駁我唔到。

而家嘅成功梗係唔係鬥搵得錢多，社會資源豐富咗，加上人類享受和平同豐衣足食幾十年，學補習天王話齋，多五千萬、八千萬，對生活都冇乜改變，成功嘅結果唔需要係財富增加。而家後生仔要嘅成功，係對社會有impact，完成自己心目中嘅使命。冇乜客觀標準，大部分係個人釐定。但你咪理，就算係任你自定成功目標，都唔係好多人做得到，唔係咁多人夠膽話自己成功。

成功唔一定賺錢

而家啲後生仔唔同，佢哋最大分別係比我哋夠膽，夠膽放手一博，去到盡。唔怕餓死有個好處，就係唔使咁早揸頸就命，老早就走去打份牛工賺錢養家，有時間做一啲自己喜歡嘅蠢事。成功嘅事喺未成功之前，通常都被認為係蠢事，成功咗之後先會被平反。呢一代人愈夠膽做一啲蠢事，變為成功事嘅命中率自然愈高。

有冇睇The Walk？呢套中文譯名不倫不類嘅驚慄片，講Philippe Petit點樣喺1974年在世貿中心行鋼線。2008年嘅紀錄片係佢真人演出，呢一套係娛樂片。Philippe Petit仲未死，係另一套真人睇人哋點扮自己嘅傳記片。Philippe Petit嘅名言就係人類要活喺生命邊緣，夠反叛，唔好隨波逐流，唔好重複自己，猶如活在鋼線之上。最近電影上畫，訪問佢究竟喺一百層高嘅大廈行鋼線驚唔驚，佢話一上到去就冇感覺，有恐懼感。

當然，佢都唔想死，一樣有練習無數次，但要成功，即使練習無數次、心想一萬次，點都要夠薑走出去行第一步。

我哋呢一代好明顯唔夠薑，驚人算賬，講句嘢都要誠惶誠恐，怕得罪人。要揣摩上意，要保駕護航，搞到話飲鉛水延年益壽。講說話嘅本應係成功人士，但係連講句說話都左度右度，人話都講唔到一句，惟有寄望下一代唔好咁窩囊。