敵不過他們，就加入他們 - 方卓如

2015年2月11日 - 信報

蘋果面對小米肆無忌憚的抄襲，最佳的反擊武器是什麼？梗係入股小米。

「你敵不過他們，就加入他們」，呢句諺語到今天更加適用。中國特色市場經濟，保護自家人於草創階段，養肥之後，放出去外邊咬人，呢招非常奏效。中國版的科技公司絕對有世界級競爭力，技術層面及商業模式，唔差得過鬼佬對手。尤其是講搵錢，腦筋肯定靈活過鬼佬。喺一個加建圍欄嘅保護養殖場，你可以做的，就是加入養殖，你成為他們的共主。你受嘅傷害，喺佢哋身上賺番嚟。

暴富之道　抄到一樣再鬥平

蘋果成為小米股東，就真係可以做一個Activist。爭取入董事局，搜集侵權證據。小米睇唔起香港，要去美國上市才高興。啱晒，正中下懷，美國上市之後，以股東身份再告你，正是美國式市場運作，到時乜仇都報晒。抄人嘢發咗達仲夠膽去人哋地頭再圈錢，呢啲咪就係短時間內暴富嘅成功之道囉。

蘋果發迹階段都抄過人嘢，但人哋抄條橋，再改良，變成自己嘢，唔會抄到一模一樣然後同你鬥平。係人都知蘋果隻滑鼠係抄人，但唔係好似而家網上訴苦信所講，馬雲嚟香港公司睇完之後，抄到一模一樣唔該都冇聲咁人神共憤。Steve Jobs當年畀Xerox喺蘋果上市前入10萬股，條件是讓佢入Xerox研究室行個轉，參觀吓。如果當年香港公司有睇吓書，學習吓人哋嘅做法，照樣開價畀馬雲，參觀公司前唔該畀我少少股份，就算不幸畀佢抄橋，仲有啲人哋嘅上市股票安慰吓，咁就唔使血本無歸。

Steve Jobs睇完人哋隻mouse，唔係即時抄。係等人哋仆直之後，再諗計加以改良，由三個制變一個制，三百蚊成本變十五蚊。再將成個menu改好晒，先變成用得到嘅滑鼠。人哋抄都抄得用吓腦，唔係做到一模一樣換個牌子咁厚顏。

不過，大家唔好誤會，賺錢嘅世界唔理會過程，最緊要結果。抄得厚顏，但只要是厚利，投資者就歡顏。我強烈建議小米考慮香港，唔怕畀人告，又可以讓我們賺錢。