股票就好似打邊爐 - 方卓如

2015年1月14日 - 信報

首富喺記者會都講過要創造更高股東價值，白啲講即係要股價有表現。又話未來可能會增加派息，因為佢逗嗰五千蚊人工，都要靠派息開飯，公司只係畀部車同啲保鑣佢咋，陰公。又係喎，冇乜邊幾間公司，落咁多心機去創造股東價值，即係股票價錢要好，仲要交投暢旺，派息慷慨，股東跟你買股票有錢賺。

創造股東價值一啲都唔容易，真係要費盡心神。咪以為埋頭苦幹做好盤生意就係為股東賺錢，幾多公司trade緊四倍五倍P/E，點賺錢股價都唔升。而唔派息嘅股票，同郵票冇分別，成交疏落冇人買，公司點賺錢，股票都係紙一張，所以要為股東增加回報，笨唔係你垂低頭專心做生意就得。不過，好多公司主席出份豐厚糧餉，股價高低唔關佢事，唔派息仲好，自己人工落袋，股價太殘仲可以自己增持，將來賣殼。

一池死水　送都唔要

首富唔止專心做生意，歷來賣資產、分拆上市，絞盡腦汁，令股價表現良好，呢樣嘢值得所有上市公司老闆學習。

股票同生意一樣，都要經營。如果齋做生意，股票擺埋一邊，上市嚟做乜？唔好以為股票嘅集資功能係提款機，幾時印股票都有人買。一旦股票變得一池死水太耐，幾平都冇人要。

股票就好似打邊爐一樣，要不停滾住滾住，保持熱力，稍加猛火就可以淥菜淥牛肉。你熄咗火，你見到煲湯已經唔開胃，仲點打邊爐？

股票就是要好好經營，生意當然要做，亦都要善用資本市場，令人覺得你隻股票唔係一池死水，一直都係滾住，到公司有朝一日要淥牛肉，大家先會合作起筷。

首富嘅智慧同手握嘅訊息，你永遠都學唔到。但係佢工作嘅態度，點樣對股東，如何善用資本市場，呢樣嘢個個都可以學。