愈賣愈貴，愈賣愈細 - 方卓如

2016年10月11日 - 信報

十大傑青搵唔夠十個，只有一半，其中一個，最傑出係27歲買樓，29歲供完，用最短時間賺到同輩賺唔到嘅錢。

你唔應該奇怪點解早買樓叫做傑青，應該悲哀由第六個打後嘅準傑青原來連早買樓嘅都不如。買樓係傑出指標之一，有乜辦法劏房樓盤唔係愈賣愈貴、愈賣愈細？

而家每日破頂嘅係細價樓，本來賣600萬嘅，間細咗可以賣400萬。購買力本來就係得咁多，將間屋拆細就可以吸納剩餘嘅購買力。劏房樓同股票拆細嘅概念一樣，就係想更多散戶入場，拆細等每手入場費較低，食盡市場上一分一毫。細價樓嘅買家沒有太多投資選擇，買樓係唯一可以享受平錢借貸兼有回報嘅投資。

有錢人不輕易出手

低息環境長期持續，樓價跌極有限，其他金融投資不但回報唔穩定，而且仲有血本無歸嘅風險。傑青晨早就示範買樓為人生傑出目標，呢條係30年來香港人單一嘅投資致富途徑。

銀紙太多充斥市場，但係錢嘅流動係有史以來最低，全球一半嘅國債被人買到負回報，證明錢多到肯付費找尋藏身之所。

呢啲錢只有兩條出路，一係靜待市場大冧，衝出嚟執平貨。一係，等了又等，等唔切市場大冧，忍唔住走出嚟買貴貨，博佢愈嚟愈貴。而家有錢人傾向前者，等，唔會輕易出手。唔係咁有錢嘅人傾向後者，因為手上只有一注，等咗好耐要落。

賭過錢嘅人就知道，等落注嘅壓力好大，好多聲音會在你耳邊嗡嗡嗡，慫恿你嚟緊呢一注就係今生無悔。

應唔應該衝入去買樓？破頂嘅係嘉湖、第一城。報載蝕讓嘅有地舖有豪宅，有錢人沽貨，其他人買貨。應唔應該買樓，睇你係邊種人。投資係好個人嘅決定，唔單只睇你財力，仲睇你性格。

你問肯買一屋劏四房，孭上一身債嘅市民，對未來環境點睇，佢未必答得上。

對，思考太多嘅，係唔會買層劏房樓。要落手上獨孤一注嘅通常唔係靠思考，係靠膽量。