熔斷熔斷機制 - 方卓如

2016年1月8日 - 信報

熔斷機制變本加厲，交易前後唔夠15分鐘就停市，創下世界紀錄。強力過強力部門嘅機制，終於頂唔住，今日起即時熔斷，暫停實施。其實我開始相信熔斷機制的確有其效用，如果唔係，上年出現嘅千隻股份齊齊跌停板必然再現，繼而就係三分二股份申請停牌，到時候股民一樣係欲沽無從，同而家冇分別。熔斷，冇跌嘅股份都冇得沽，唔需要受牽連，唔會火燒連環船，唔會好股迫住要同衰股跌，第二日復市繼續扔衰股，留好股一命，以免全世界爭相停牌。荒謬嘅市場要用荒謬嘅方法管理，又學到嘢。而家冇咗熔斷機制，你睇吓，會否有多隻股份跌停板，而且跌到部分股份要求停牌。

唔好靠基本面買股

2016年，你嘅首要任務係要清除根深柢固嘅概念，要與時俱進，重新認識呢個世界。例如你畀人洗腦，買股票要睇fundamental，2016年千祈唔好咁諗，A股已經話你知，你係冇本事靠fundamental去搵錢。靠fundamental，升市你唔敢入市，錯過升浪；跌市你買所謂平貨，愈買愈輸，fundamental害鬼死你。熔斷一役，更好fundamental的公司都冇人敢買，因為市場完全唔自由，買得唔沽得，邊個敢入市？無人敢買嘅股市，如同死城，元氣大傷，失去集資功能。

香港想搞港版嘅熔斷機制，睇見A股嘅慘況，千祈唔好多手。多年來香港都任升任跌，相安無事，交收有序，千萬不要學習A股市場。如果連股市嘅「一國兩制」都守唔住，香港就真係全面玩完，唔使強力部門出手，香港人都要自己搵方法搭艇走。

2016年四日內就出現環球金融危機先兆，原因係世界最後嘅救星中國自己都開始搞唔掂，經濟放緩，股市下跌，貨幣貶值。2008年美國唔掂嘅時候，中國買美債、印銀紙、貨幣升值，支持美國繼續消費養傷。

8年之後，美國復元，可以加息，反而全世界都內傷，連中國都頂唔住。冇一個國家嘅貨幣對美金唔貶值，產油國都唔夠錢要勒緊褲頭，巴西直情窮到總統都要被人民嚷着要趕下台。全世界用8年時間救美國，但係而家全世界只係傷淨美國。

結論係，2008年全世界本來要受嘅後果，延至今年終於要到，但只有始作俑者美國可以幸免，反而救佢嘅國家全部都要受。所以話，金融呢味嘢係美國發明，其他國家邊夠佢玩。