認凳定係認人 - 方卓如

2016年1月14日 - 信報

陳仔係明日之星，唔單止喺佢做嗰行係星，愈搵愈多，愈嚟愈紅，政治上佢都係星，星在佢四四正正，又識得人多。以佢嘅年紀，佢識嘅人，數一數二，電話可以打到畀唔少電視機成日見嘅人。佢嘅政治人脈關係，積咗十幾年，到佢搵夠可以收山嘅時候，一定可以出山做番個電視機成日見到嘅人。

不過，佢都知道，呢啲積咗十幾年嘅人脈關係，同罐頭一樣，會過期。佢要不斷無間地去跑，先可以維持一個熱辣辣嘅人脈關係。點解？政治嘅嘢，你唔係巴結個人，你係巴結張凳。人走茶涼，你係要結識坐喺位嗰個人。企咗起身，佢只不個係普通人，其實分分鐘差過普通人，因為普通人唔會累到你。位置不停轉，你不停要去建立維持人脈，辛苦到暈。

掉轉頭，你坐到某個位置，人哋都會走埋嚟巴結你。政治嘅所謂人脈，咁鬼時令，陳仔鑽營咗咁多年，依然繼續鑽營。

做金融就唔同，人脈係跟人，你自己就係張凳。你今日建立到嘅人脈，轉咗舖，一樣可以帶走，同亞視一樣永恒。做金融建立嘅人脈，值得用心機栽培，因為必定見到回報，只係回報多定少。做呢行嘅第一任務，唔係先去搵最多嘅錢，而係先去搵最啱嘅人。

金融人脈難建立

金融嘅人脈又比政治嘅人脈難建立、難鞏固，因為唔只係飲茶灌水，要用不斷嘅利益去維繫。能夠有源源不絕嘅利益去維繫，你本身都要有番咁上下。所以，金融嘅人脈，唔係你新入行就可以主觀願望地主動去建立。

政治反而就真係可以純粹靠飲茶灌水開始，反正除咗飲茶灌水都冇乜嘢可以做，唔通可以明目張膽走去利益輸送？所以特別多政治飯局，而金融飯局通常係自己人聯誼，人脈老早已經喺飯局前建立咗。

陳仔唔係做金融，佢搞政治人脈對佢有幫助，所以佢飯局特別多。唔係咁多人可以有陳仔嘅背景，唔使諗學佢，不如疊埋心水，培養你金融嘅人脈。