開始變成股票城市 - 方卓如

2016年1月4日 - 信報

2016年，要講有乜嘢投資策略，其實好容易啫，一定係股票。香港人投資，只係得樓同股票，其他都唔係主流工具。樓，2016年仍然會不斷被人唱淡，唔跌都唱到跌。股票唔同，大市唔升都會有個別股票升，所以成日講炒股唔炒市，樓就未聽過炒樓唔炒市。2016年，獨孤一味，炒股票。

啱，對路，喺香港唔炒股票都冇嘢好做。你睇吓報紙，上市公司轉型都係做股票，資深物業投資者又係轉型做股票。就算你做出書嘅，唔想突然間唔見咗，最安全就係講股票，股票畀到你最大嘅言論自由，講錯咗係唔會有人捉你走。香港由一個經濟城市，再進一步變成一個股票城市，因為其他經濟活動都逐漸停頓，只有股票交易係每日都唔會停。

大升一定係冇盈利公司

股票城市有股票城市嘅玩法，要真正明白同熟習其實唔係咁易，好多時候仲會同常理背馳。股票城市最賺錢嗰個唔係買啱嗰個，係印嗰個，仲要係印到同賣到。識印要講實力，識賣要講人面，兩樣嘢都同公司賺唔賺錢無關。Tesla唔賺錢，WhatsApp冇乜錢賺，但係佢哋啲股票有價有市。香港唔會出現呢種改變人類嘅公司，但2016年股價大升嘅股票，一定係啲冇盈利嘅公司。你好難可以預計邊間冇盈利嘅公司可以跑出，因為股票城市，名同利係相剋，唔會兩者兼得。上年嘅股王，造就中國首富，公司轉眼就停牌，首富要半價場外割愛。股票城市只讓你二選一，獎金定獎品，唔可以貪心。

明白股票城市是什麼一回事，你就知點樣為自己定位。股票城市特點是認錢唔認人，運作上係唔一定需要香港人。好多上市公司喺香港只係得一個人，甚至一個人都冇，搵專業人士幫手接電話。所以我幾時都話，香港唔會瓜，但係香港人隨時瓜得。股票城市隨時可以變成有如美國的寶達城（Boulder City）。寶達城你未聽過？呢個城最特別係在於，佢係特別造出嚟俾建造胡佛水壩嘅工人住，係養住一班人去為其他人服務。胡佛水壩起好80年，寶達城依然存在，仲成為一個退休城市，因為生活成本夠平。香港將來住嘅，會係最有錢，要嚟避開霧霾嘅有錢人，同埋支援股票城市運作嘅基層。