唔博等幾時？ - 方卓如

2015年9月8日 - 信報

大學生而家讀完書出嚟做事，人工同廿年前比，多少少。但係而家大學生出嚟創業嘅機會，就比廿年前多好多。廿年前畢業出嚟做嘢，一皮嘢，不知幾好使；年年加人工，加得少搵過第二份，安安份份，總會做到夠你退休過世。過去廿年，係大公司生存者嘅年代，你懂得點樣喺大公司大機構生存，唔強出頭，唔爭風頭，默默耕耘，交到功課，你自然食好住好，得咗。

廿年後今日，畢業都係一皮嘢，就算你唔使畀屋企，每個月都係掹掹緊，顧得食就冇得着；顧得着就冇得玩。你唔去日本旅行，剩番嘅錢你估夠首期？買部iPhone都唔見咗。

升職冇咁快，裁員就第一個。負責裁員名單嗰個，係一個頭髮稀疏，深近視，屋企有兩個細路，營營役役嘅中年男人，佢好自然會裁走羽翼未豐，未夠經驗幫公司賺錢，卻要資源培訓嘅新人。況且，呢班新人將來就係代佢個位嗰個，唔裁佢裁邊個？畢業之後去大公司大機構打工，要生存唔容易，生存到亦未必幸福。

創業成本大跌

反而，佢哋今日去創業就易過廿年前好多，廿年前你要租寫字樓請人先叫創業，至少裝部電話整部Fax機。而家？你攞部電腦去咖啡店坐一日，咁就係開咗檔㗎喇。

再盡啲，拿住部iPhone坐緊地鐵都做到生意，秘書都唔使請。以前Call機有秘書台，做你秘書聽口信。而家點會有人搵你唔到？出嚟打工嘅，人工廿年冇乜加過；但係出嚟做生意嘅成本，廿年嚟就跌咗好多。

年輕人，而家唔係要喺大公司生存，係要喺成個社會度生存。以前有大樹好遮陰，而家時興斬樹，再冇依靠，靠自己跳落水游。人係習慣向以前學習，跟隨以前成功人士做法；但現在開始嘅成功方法，肯定以前從未出現過。唔使怕自己冇經驗乜都唔識，大你廿年嗰啲冇頭髮嘅中年男人，同你一樣都係乜都唔識。與其(手豆)嗰一皮嘢搵朝唔得晚，出嚟放膽博一博，總好過你日日帶飯為供層樓。