調整定係冧市 - 方卓如

2015年9月14日 - 信報

一條哲學題：「今個星期聯儲局議息，如果今次唔加息，究竟對股市係好消息定壞消息？」而家股市由高位冧咗落嚟，梗係想聯儲局唔好搞咁多嘢，保持低息，令股市唔好再受壓。唔加息，梗係好消息。咪住，美國冇可能長期維持咁低息，總有一日要加番上去，否則美國等於斬咗兩隻手，將來冇晒招數刺激經濟。

9月唔加，即係有機會10月加，加息呢個預期揮之不去，對股市更差，仲會即時推冧個市。咁即係話，加息對個市唔係好消息，唔加亦都唔見得好得去邊。

太多人靠股市開飯，所以股市係唔會一池死水太耐，到恐懼感差不多消失，貪念又起嘅時候，又會繼續入市。而家嘅恐懼感唔係好關經濟事，中國早幾年經濟咁好，唔見A股有乜好表現。佢炒到火紅火綠，正值中國經濟下行壓力嘅時候。只要多數人認為股票可以賺到錢，自然就會抬錢入場。

樓價唔冧就係調整

啱啱先至殺咗一批捱唔住嘅股民，佢哋冇本錢入市；未輸入肉嘅，而家未驚完又唔敢入市；冇事冇幹嘅，仲吼緊筍價先至入市。

兩萬點都未穿，彈番千五點，唔足以令任何人入市買貨，只有嗰班工作就係買股票嘅，喺到買買賣賣。佢哋互相廝殺，只會令個市升吓跌吓，唔會有上升動力。

唔買股票唔使死嘅，但係唔買樓對好多人嚟講就周身唔聚財。股票令你蝕錢你唔會買，但係買樓會蝕都唔會阻到人發達，照買。買股票係用零用錢，買樓先用血汗錢。

而家股票令唔少人輸咗錢，市面上氣氛你唔覺太差，但骨子裏好多人已經要使少啲。如果樓價冧埋，你就會感受到真係窮。點樣去分辨調整定係冧市？好簡單，樓價唔冧就係調整，講完。