狂牛任務未完 - 方卓如

2015年6月1日 - 信報

香港上周四跌咗800點未算係股災，A股跌咗6.5%就得人驚啲，因為內地有跌停板機制，實際上跌嘅幅度係可以勁過6.5%，只不過機制令佢分幾日跌。《經濟學人》都出聲話A股泡沫太勁，但係出現調整又唔會太過影響經濟，因為股市佔GDP唔係咁大，即係冇講嘢。

內地大媽唔會睇《經濟學人》，所以佢嘅長篇大論分析對A股係冇影響力。反而嗰啲微信追蹤戶，什麼格隆匯、雪球，佢哋先有影響力。不過，佢哋唔會夠膽寫嘢嚇人推冧個市，後果會比輸錢更嚴重。

A股靠阿爺夠撐

話A股太高係因為盈利追唔上股價，但係喺美國盈利追唔上股價嘅公司亦唔少。Tesla到而家都未賺錢，股價現時係二百幾蚊美金，談不上什麼市盈率。又唔見《經濟學人》話Tesla係泡沫？架車有型有款，仲識搵人寫軟性鱔稿推銷汽車，該公司股價一樣可以係泡沫，正如股王老闆係中國首富咁威水，股價都要受制於地心吸力。盈利同股價唔一定掛鈎，中外一樣。

A股太高係因為做唔到個勢、股民肯攬住股票當寶。股票唔派息，其實係郵票，賺多多錢都冇用，但係只要你懂得整到人人都想揸股票而唔想掟你，咁你隻股票就唔會有沽壓。有時，反而公司賺錢更加做唔到呢步，公司賺錢反而令股東想沽，因為睇穿你係得咁多，唔會有懸念令下手肯接手上股票。中港股市而家係買阿爺想搞旺個股市，用股市救經濟。只要一日仲係咁估，大家就放心入市。

到目前為止，未見阿爺有大手批股行動，未有大額出售資產，狂牛市到目前為止仲未完成救經濟任務。心思細密嘅阿爺，點會半途而廢？反而外國勢力就好大可能唔想阿爺股市救經濟成功。內地樓市可以係封閉市場，但股市要達到救經濟目標，就唔可以完全封閉，係要有外面新錢進場，咁先可以避免塘水滾塘魚，財富內部轉移而冇實際進賬。《經濟學人》類似A股太高就爆嘅說法，未來你會聽好多。

記住，遲早一日會冧，但弊在冧之前升到開巷，你太早睇啱隨時輸得慘過睇錯。