諗過度過輸得仲甘 - 方卓如

2015年5月29日 - 信報

上市公司最擇使係乜嘢？唔係蝕錢，上市公司唔怕蝕，蝕到變負資產，股價都唔會係負數，證明股東係唔介意公司蝕錢。最怕嘅係集唔到資。上市公司集唔到資，衰到連大股東都冇錢扔落去攞新股票，咁就即係玩完。

唔好誤會，上市公司唔係要賺錢先可以集到資。賺錢唔派息，股票即係郵票，市場唔活潑嘅話，你賺多多錢股東都冇着數。股東首要係賺價，你隻股票有價有市，股東就開心，再攞錢出嚟增持都冇問題。上市公司老細每日要諗嘅，係點樣為自己隻股票創造價值，賺錢只不過係其中一個創造價值嘅入門方法。如果股票唔升價，上市公司賺幾多錢都畀股東鬧，你睇吓利豐（00494）就知。

而家時興財技投資法，唔使理咁多基本因素，亦唔使睇圖，純粹睇上市公司最近有什麼資本市場動作，就可以估佢係唔係炒上。批股、發輪、供股、分拆、派送，全部變成訊號。究竟財技投資法呢招行唔行得通？

贏錢不用腦　靠耳仔

你識唔識玩帆船？如果風喺前面吹埋嚟，你估隻船會點行？答案係點行都得。迎住風行可以，背住佢行又得，甚至打橫行都冇問題。風係死嘅，人係生嘅，點樣用陣風去達到自己嘅目的，得掌舵嗰個先至知道。

你見到上市公司做咗一個動作，佢背後發生咗什麼事，真相如何，外人係一定唔知，同你估嘅亦好多時候背道而馳。你用腦去諗，諗到似層層，連自己都呃埋，信以為真，然後走去買，我肯定你輸得多過飲茶聽隔離枱講冧巴。呢個世界好邪，認真去諗去買，諗錯咗，輸得勁過乜都唔識人哋叫買乜就乜。你諗過，會瞓身。聽冧巴，你落閒錢。諗過度過輸得仲甘。大時代要贏錢，先要放低你嘅腦袋，然後豎起你隻耳仔。