人造出嚟嘅替身 - 方卓如

2015年3月26日 - 信報

上市公司成日都有塊免死金牌，就係要對股東負責，上市公司唯一目標，就係要為股東謀取最大利益。有呢句金句，上市公司狂加租應份，大加票價合理，過程令市民社會受苦，sorry，上市公司是冷血的，是機械人，眼裏只有股東，為佢哋受盡千夫所指，全身中箭，又如何？

《經濟學人》有講呢個問題，究竟為股東賺盡呢個藉口啱定唔啱。為股東賺盡，結果可能是Enron，咁即係只求股東利益唔應該係必對定律。《經人》有佢嘅分析，但用我最layman嘅眼中睇，有限公司本身係一種保護股東嘅經營方法，用制度創造咗一個替身，代替股東去請人、借錢、簽合同。有什麼事，有限公司負責，股東毋須上身。就係因為呢個人造人是設計出來的替死鬼，所以問人借錢時，要股東擔保，以免替死鬼一死以謝天下，唔還錢。

上市公司只不過是有限公司進化版，讓你可以自由更換股東身份，骨子裏都是一個人造的經營軀體。

如果一個人話要為自己賺盡，不顧其他人死活，在社會道德上是天理不容，無理由將這句說話搬到由人創造的軀殼上，就會變成真理。

上市公司並非無人駕駛，是由人指揮。賺到盡，得益嘅唔係公司本身，係駕駛佢嘅人。

認實最貪心嗰個

用「為股東賺盡」做理由，下一句其實係「我都會水漲船高」。世上沒有無緣無故的為股東賺盡，上市公司唔識貪心，佢只係將駕駛者的貪心反映出來。

下次再有人理直氣壯話，上市公司就係要為股東賺盡，你認住佢，佢就係最貪心嗰個。