叻到可以做首富 - 方卓如

2015年3月25日 - 信報

管治一個國家其實同做生意方法差唔多，只不過難一百倍。新加坡咁權力集中，同一般華人公司好相似，最啱用嚟做比較。

做生意最難由冇到有，由街邊推車仔到入舖再到買舖，一蚊一蚊逐少逐少捱番嚟。新加坡就更加乜嘢都冇，冇水冇靠山。 咁多人嘅食飯問題要解決，搵少個錢分分鐘暴動。管治國家同做生意唔同嘅係，做生意如果你搞唔掂，最多裁員補充元氣再嚟過，但國家冇飯開，你唔可以殺晒啲人民洗牌再嚟，雖然見過餓死一大班之後百廢待興嘅慘劇，但好人好姐唔會有人咁做。

建國當做生意　神人也

仲有，做生意搞唔掂可以賣盤，可以搵人入股。國家冇得賣，冇得叫人入股，點艱難都要自己頂硬上。可以借，但通常國家一借就借一世。一個乜都冇嘅國家要搞得起，係要窮盡渾身精力，冇得退後。

做生意要賺錢，賺得愈多愈叻仔；管治要講GDP，愈多愈繁榮。但做生意賺多咗，你想善待員工，派花紅就得。派得夠勁，保證全部攬住你嚟錫。GDP呢家嘢好唔同，愈高，唔代表個個開心。分唔勻就一定，全世界冇一個政府可以有本事將GDP分得勻，總有一啲人受惠唔到GDP增長。

新加坡好嘢，人人派間屋，就算你點窮，有瓦遮頭唔使擔心。食飯，可以去梗有一間喺左近嘅熟食中心，食一碟雞冇雞味但依然排長龍嘅海南雞飯，人嘅基本生存係可以有尊嚴地無憂進行。可能會磨滅晒人嘅鬥志，但一定唔會激起人嘅憤怒。養馴咗一大班人民，你要千秋萬世容乜易。

做生意係要建立一部會自動行走嘅機器，根據你設定的制度運行。可以將呢套做法搬到去一個國家，每個人甘願變成一粒螺絲，仲要喺你死咗之後讚你做得好，真神人也。叻到咁，換轉走去做生意，佢已經係首富。