中後防遲早俾人攻破 - 方卓如

2015年2月3日 - 信報

金融服務業要輸入內地人才，這是一條偽命題，從來金融界一直就係「無掩雞籠」，邊個都可以走入嚟搵食，你有本事就得。而本事呢兩個字仲非常廣泛，唔單止睇你讀過乜嘢書、有乜嘢quali，仲可以睇你有冇錢，有冇人脈，同邊個係你老竇。

唔好咁狹窄以為金融界淨係得做大刁嘅投資銀行家，幫你「走走糴糴」嘅私人銀行家都係金融界，佢哋識得多有錢嘅uncle、auntie絕對係優勢，你讀得書多都冇得同人爭。

一條龍自己人

有本事嘅人，唔理你內地人外地人，土豪定鬼佬，不嬲都係有能者居之。工作簽證難攞易攞快攞慢攞是政府嘅事，但從來冇試過落閘阻人。最高端嘅金融操作，簡稱為老細，更加係中門大開，你夠錢就歡迎你埋枱，連簽證都唔使。

唯一要靠本地知識嘅，就真係中後防嘅位置，settlement同compliance。呢啲位置，識幾多人都冇用，要識例、要浸、要慢慢教。以前啲金融界外勞，即買即用，貪你識人同有錢，擺到明係利用你。將來連中後防都有外勞，就係肯用時間投資嚟訓練你、培育你。究竟外勞有乜嘢地方優勝過陀地？好簡單啫，同聲同氣，前中後一條龍自己人，開會都唔使就你啲唔鹹唔淡嘅普通話。其他嘅一條龍好處，我唔使多講。

以前話香港人守住中後防，保持香港核心價值，令投資者有信心。而家要前中後一次過鏟起，香港人有冇得做唔理得你，你問我係好定唔好，唔需要我多講。

而家最當紅嘅演講嘉賓，梗係首富啦，只不過係馬首富而唔係李首富。馬首富講嘢叻到爆，好多人都領教過。15年前佢第一次嚟香港講嘢，我都聽過，那時候佢剛剛紅，上咗Forbes封面，一開聲，真係全場靜晒聽佢講。唔係因為佢紅定唔紅，係佢講嘢的確有吸引力。呢個世界，就係有啲人講嘢寫嘢吸引到人追住聽追住睇。有冇得學？我唔知。但係識講嘢嘅人，做乜都可以遇神殺神。你要快啲搵吓自己有乜強項，如果talk又唔talk得，做中後防又唔熟例，神都幫你唔到。