補給站遲早賣假貨 - 方卓如

2015年2月24日 - 信報

發哥無懼封殺，最多咪搵少啲，但套戲一樣收幾億，唔會話要刪剪佢嘅戲份，又唔會話拒絕佢入境做宣傳。呢啲叫做乜？人到無求品自高，你唔需要搶一堆堆只不過係紙嘅銀紙，自然可以講真話，講到人哋都唔敢搞你。

唔好怪港產片一啲都唔香港，變晒合拍片，要符合內地人口味。畀你拍一套港產口味嘅飛機片，咪又係畀你哋搞到鬼五馬六。唔止香港，全世界大片廠拍戲，都會問「套戲入唔入到大陸」。

電影反映社會現實

所以奧斯卡最佳影片，得一套係大片廠製作，其他全部係獨立製片公司，得佢哋肯去籌錢拍啲另類好嘢。Boyhood一拍就拍咗12年，每年要20萬美金，大片廠計唔掂條數，唔會有人肯制。佢哋只會拍幾億預算嘅大片，入大陸收一兩億美金，全球收10億，咁就係盤生意。所以電影同社會都係兩極化，一係有錢人一係窮人，中間完全唔見晒，所以幾時都話電影最能反映社會狀況。香港而家變咗大陸的補給站，遲吓會發展成點？唔好畀我估中，遲吓香港都會賣假嘢，咁就真係兩地融合。

而家南下購物因為你真，同埋滙水夠平，換錢又方便，過關又通行無阻。補給站賺到咁上下，業主就會走嚟抽水，將經濟租值全部抽走。呢個時候，補給站要賺一個見得人嘅利潤，惟有賣假嘢。內地人一直以為你真，冇戒心，不虞有詐，一直買買買。到揭發原來賣假貨，到時候已經係地溝油一樣，擴散全港，唔止補給站，處處難分真假。搞到咁就唔會再有水貨客，但係一個城市咁就玩完。

信唔信？遲早你就會睇到新聞，有藥房賣假貨。