進步過十年前 - 方卓如

2015年2月18日 - 信報

年三十晚，仲有邊個有心機炒股票？農曆新年是最好的外遊機會，十年前在外寫稿要周圍搵fax機，或者掃描手稿之後再電郵。今時今日，在手機打完之後即刻可以WhatsApp交稿，你唔會知道寫稿人究竟喺邊，題材一樣可以貼市。科技先進其實係大大提升了生產力，亦將人類要花嘅工作時間大大減少。不過，唔係咁多人習慣可以騰出咁多空閒時間，亦唔知點樣可以利用這些空閒時間增值。最緊要係，你知唔知未來什麼才是最值租，你投入時間精神唔會令你蝕底。年三十晚，最啱係諗吓壓歲錢入面應該放啲乜嘢未來諗法落枕頭底。

最緊要有國際視野

而家做人最緊要真係要有國際視野，或者唔使講到咁高尚，最基本要知道世界發生緊什麼事，對你又有什麼影響。國界邊界只不過界定了一個地方用什麼遊戲規則，但其他無論語言文化甚至生活方式，同邊界已經冇乜關係，影響你生活嘅唔一定喺你生活邊界內發生，你睇吓香港，你生活大起變化，究竟係喺香港入面還是香港外面嘅原因？你對眼要望多啲出面，先可以照顧好你自己嘅生活。

仲有，而家做人真係要靈活啲，世界變得咁快，唔係以前咁可以無風無浪直線咁生活下去。就以工作為例，以前父輩可以一技傍身，一份工養妻活兒。而家邊種技能夠千秋萬世，無人知。而且世界要嘅技術，真係每個時候都唔同。你冇一份靈活心態，及時轉身，投入唔到時代，就被時代淘汰，

最後，你要明白，歷史不斷重複自己，只不過每次都用唔同樣貌出現。多啲了解之前發生什麼事，對了解未來走向好有幫助。

而實情是，新年難過年年過，每一年就只有農曆新年，大部分人停晒手，可以讓你真正放低所有事，同屋企人過。祝大家新年進步，身體健康。下年見。