時機價錢啱啱好 - 方卓如

2015年1月13日 - 信報

過去首富做得最叻嘅事情，就係賣嘢，永遠都可以喺最好價錢最好時機賣走。記住，價錢最好未必等於時機最好，時機最好價錢又未必好，要兩樣條件都同時存在，咁先至係神級賣嘢。

呢幾年佢只賣唔買嘅，就係地產，仲記唔記得本來連荃灣酒店都想拆嚟賣？係最後政府唔畀佢賣，截停咗。

首富呢幾年投資整蛋都唔買地起樓，就知佢雖然地產致富，但時移世易，唔會抱殘守缺。拆咗件純地產上市公司，幾時想賣埋都得。

分拆地產　幾時賣都得

以前上市公司控制上市公司，最頂嗰間俾人買咗，成串公司都冇晒。好處係成本低，唔好處係有被狙擊風險。市值咁大，本來有咁嘅財力嘅人唔多，加上江湖地位，冇人會夠膽郁手。但他朝龍頭大佬不在，成間俾人買起的場面，並非冇可能。

做一、二、三步的目的，就係要將唔要嘅拆走，要嘅擺埋一堆。要證明這一點，非常簡單，睇睇將來是否長地的股份慢慢攤薄或減持，而長和就愈揸愈多。即係話，首富嘅部署未行完，一、二、三步之後仲有四五六。全世界只係眼望遷冊，分拆反而唔多人講，因為佢表面上冇乜政治含義。以首富嘅智慧，梗係知道遷冊會俾人大做文章，視線集中。佢點會唔一早向上解畫，要阿爺睇報紙先知。全部人引晒去嗰度，仲好，冇人會睇到分拆完之後可以未完再賣埋。

你睇吓居屋條人龍咁瘋狂，就知道而家嘅樓市有幾危險。當市民有錢全部只係識買樓，加息在即，但港紙被綁住變成愈來愈貴，全部都係危險訊號，97年就係咁情況。

首富曾經試過大冧市前成功集資，佢手握嘅資訊同幾十年嘅智慧，無人能及。與其你八卦佢做乜鬼遷冊，不如你睇番自己銀行戶口，如果嚟一次大屠殺，你生唔生存到。