年輕人未算最慘 - 方卓如

2014年11月10日 - 信報

呢個世界啲領袖，日諗夜諗就係點樣鞏固自己嘅權力，同做生意日諗夜諗點搵錢一樣啫，好正常。香港人只不過一直都係被訓練專心搵錢，冇人教過亦唔鼓勵如何奪權。純情嘅香港人理性和平爭取，喺政治人眼中，唔會係咁簡單，就好似地產霸權做乜嘢都好，人哋睇都係為咗搶錢。

領袖而家為咗鞏固權力真係無所不用其極，你睇普京而家為國捐X，要搞到全國都係兄弟姊妹，到時乜嘢選舉都好，大家都係自己人，普京王朝千秋萬世，真係打到腳軟都抵。

當乳牛的一代

有人話而家啲年輕一代好慘，競爭又大，機會又少，所以積落好多不滿。其實你有冇諗吓，佢哋啲老豆老母仲慘。佢哋最大嘅成就，可能只係有層樓喺手，除此之外，份工可能危危乎，兩公婆貌合神離，父親母親身體日差，嗰仔日日走咗去瞓街博拉。一份糧養5個人，真係少個崩都唔掂。呢代人真係從未嘆過嘅一代，後生嘅時候掛住讀書考試，出嚟做嘢掛住賺錢供樓，大個啲就望升職搵奶粉錢，人工加咗就成份用嚟供書教學，到差唔多夠鐘退休，嗰仔仲未養得掂自己，有排同你住。

呢一代同隻乳牛冇乜分別，一夠鐘就畀人揸到乾為止。不過，好彩佢哋一啲都唔覺得痛，因為由細到大佢哋就畀人灌輸呢種生活先係正常。而家啲學生要出嚟瞓街，好大原因就係唔想再做另一隻乳牛。不過，就算佢哋想做都冇，冇咁舒服淨係畀人揸。將來啲年輕人大過咗，只可以做黑熊，畀人拮住攞膽汁，辛苦百倍。你話而家年輕人啲老竇老母，面對此情此景，係咪仲慘過啲仔女？

日圓大幅貶值，香港人以為執到寶，去日本旅行夠平好開心。但係港紙唔跌得，換嚟嘅就會係資產價格下跌。

九七年咪試過一次，之後啲報紙都有唔少評論馬後炮寫過。唔使識經濟學，你睇番過去幾十年，邊個國家啲貨幣升值，邊個國家就冇運行。日圓跌得咁猛，唔理人間死活，小心你去完滑雪返嚟，連層樓都冇埋。你睇，年輕人老豆老母呢代幾多嘢煩。