同化完一次又一次 - 方卓如

2014年8月19日 - 信報

最恐怖係乜嘢？唔係遊行派錢，亦唔係搞手強烈否認遊行派錢，而係社會見到遊行派錢證據確鑿，都冇乜反應，覺得理所當然，派錢係正常，唔派先怪。當不斷喺你耳邊講要和諧、要包容，和和吓、包包吓，你會覺得好多匪夷所思的事情，是國情，是發展中的必經階段，是以13億人口整體利益為依歸，是有自己國家特色的一套。

殖民最高境界

你從前以為啱的一套，唔單止冇國際標準，更加唔可以將西方一套照搬。唔使等好耐，你會連是非都唔識分，而更進一步，你會開始用新嘅一套去做人。殖民最高境界就係同化，歷史上唔係咁多地方可以同化成功，但香港可以同化完一次又一次，可算是破紀錄。

我師傅有一樣嘢最叻，就係教到自己啲助手tup tup掂。要知道，我師傅做嘅工作，係中環最高深嘅一套，識少一瓣，輕則輸幾個億，重則人間蒸發。如果所託非人，畀個唔生性嘅手下搞衰咗單deal，喊都無謂。佢公司一副機器，運行得咁順利，一啲都唔簡單。

師傅一個人做晒

佢有乜秘訣？秘訣就係個腦轉得快，又熟啲工作程序，最重要係夠細心，知道邊個手下識做啲乜，同埋佢哋會喺邊個環節犯錯。Virtually其實都係佢自己做晒，只不過變咗佢有多二十對手，可以同時間做幾樣嘢。喺某啲環節，畀夥計諗吓嘢，引導佢哋分析吓。絕大多數情況下，其實佢諗晒，其他人照做就得。我師傅咁做嘢法，佢係CEO、培訓部、戰略研究、銷售人員集於一身，只有茶水部阿姐嗰份工冇佢份。佢咁做嘢法，唔係平常人可以做得嚟。

唔好睇佢咁勁，佢平時嘅生活，同你隔籬鄰舍冇分別。去打波（唔係打哥爾夫球，係喺球場打波），着件風褸，坐架Alphard周圍走。低調到接近隱形，呢啲就真係悶聲發大財。人哋話有名就有利，我師傅就係最勁嘅只要利，最好連名都冇人知。