卡片人 - 方卓如

2014年8月20日 - 信報

足球員生涯其實可以幾悲慘。佢哋喺人生發育緊同發展緊嘅時候，已經到達人生高峰，搵最多嘅錢，攬最多嘅女。人哋30歲嘅時候開始發圍，佢哋30歲嘅時候已經要諗收山。仲有成50年命流流長，做乜嘢好？唔飲酒唔吸毒都唔知點過日辰。普通人會在20多30歲嘅時候犯錯、輸錢，然後學識理財。幸好當時可以輸嘅錢有限，30歲開始做番啱未為晚也。但足球員一識得犯錯，就係佢哋一生人最多錢輸嘅時候。一輸，就冇得翻身。

以上講嘅已經係一個成功而搵到錢嘅足球員。搵唔到錢嘅，唔代表冇以上問題，而且問題來到時可能更慘。佢哋有機會周身傷痕，雙腳其實接近殘廢。30歲拖着一副殘軀過下半生，對好多人來說，係悲慘生活。好多退役嘅足球員，接受唔到退休生活。

中環冇足球員，但一樣有足球員一般生涯的工作人員。他們感覺良好，因為在一間大公司工作，有一張好得體的卡片。他們一開口，就圍繞住公司而發言。外人對他們會幾客氣，因為有機會同佢嘅公司有生意來往。唔睇僧面都睇佛面，唔畀面你，都畀面你張卡片。

無卡片無人理

呢類人好悲哀，因為佢哋一冇咗張卡片，就邊個都唔係。出到去見番舊相識，面口會唔同咗。打電話畀人，人哋未必睬你。同足球員一樣，離開咗球場，你就係一個普通人。但足球員還好，面孔就是卡片。而你，卡片就是你面孔。