知少啲幸福啲 - 方卓如

2014年8月22日 - 信報

攞住本年報公告左刨右刨，希望可以找尋出投資價值，甚至乎股票陷阱嘅人，唔單只係專業投資工作者，連平民百姓亦加入此行列。普通市民，都識得發電郵去上市公司的投資關係部，索取一些年報沒有詳細記載的資料。本來這種勤奮行為值得表揚，亦都係一直獲鼓勵的行為。不過，我可以好肯定話你知，你做咁多功課都係嘥氣，你永遠唔會喺呢類資料知道晒百分百嘅事實真相。

知得多錯得愈多

吓？莫非所有事情都有不能說的秘密？Well，唔使咁陰謀論，唔係話上市公司要呃你，之不過，現今的文字及表達要求，未足以令深層次的諗法展露出嚟。你知道以前有恐龍，但佢哋點死，佢哋身上有冇顏色，呢啲真相，你永遠都唔會知。同樣道理，上市公司做緊乜、點解咁做、有乜後果，你一定唔會知。

女士們最大的幸福戒條：知少啲開心啲，同樣適用於投資股票。你愈覺得自己知得多，錯嘅機會愈多。你覺得自己知得少，有恐懼感，會趨吉避凶，控制風險，留意注碼，唔會買得多，贏夠唔貪心就走。

但你一旦做完功課，覺得自己清楚自己買啲乜，本着睇準機會一鋪過嘅心態，你真係會夠膽瞓身。瞓身得兩個結果，一係贏到開巷，一係輸到瞓街。贏到開巷之後，你唔會停，會發掘下一隻瞓身的機會。結果係，你最後一定瞓街，因為咁你先會停。

咁灰？咁咪即係唔好問，只要信？都差唔多，我夠膽講，要真正知道一間公司做緊乜，要坐到好埋好埋，直頭要埋到聞到他呼出來的空氣，咁你先有七成把握。記住，都只係七成，要知全部都仲係有難度，知到百分百的只得老細，永遠唔會係分析員，業餘嘅更加唔使講。