長期放水嘅狀態 - 方卓如

2016年9月22日 - 信報

橫洲事件冇拖薯片落馬，證明佢真係乜都冇做過，想屈佢都唔得，咁就過咗一關，薯粉安心。特首選戰開始，得閒買定多啲花生，大把戲睇。

講得太多橫洲，本欄對已死之物興趣不大，喜歡向前看，講錢。本欄見報之時，聯儲局已宣布息口，相信會是維持不變，如果屬實，大家要習慣一個各國央行長期放水、永不收水嘅狀態。

8年前，當美國開始放水，大家預期放水總有一日停止兼掉轉頭收水；但8年之後，當聯儲局講過咁多次話加又唔加，大家要有準備，說好的收水可能唔會出現，因為冇人可以接受到收水之後嘅震盪。持續放水，終有一日大家攬炒；但收水，而家即時攬炒。等於人人終有一死，但人有求生本能，總會想生存得幾耐就幾耐。全球央行都知道，佢哋冇得選擇，一定要繼續放水，繼續落麻醉藥，停藥就大家痛苦。

不停放水，對最有錢嘅一群冇問題；最窮嘅有啲問題；唔上唔落，有啲抵押資產嘅就最大問題。最有錢嘅，大爆煲後反而可以筍價入市買資產，係佢哋「掠奪」財富嘅最佳時機。

貧富懸殊愈演愈烈，愈來愈少人擁有世上最多財富，中間經歷過大大小小金融危機，證明金融危機不但只唔會打散富人財富，掉轉頭反而令普通人財富轉入富人手中。最窮嘅，資源分配愈來愈少，生活愈來愈艱苦，脫貧機會同門路逐漸被封，當然係受苦嘅一群。

有抵押資產嘅最慘，你見每次金融危機都有人破產，特別係好景時用債務堆砌出風光嘅一批，金融危機就將呢班人唔止打回原形，仲會打落幾層地獄。由奢入儉難，嘆慣嘅好難番轉頭，呢班人永遠係金融危機最傷嘅一群。

無錯，而家銀紙係好多，但銀紙嘅流量卻係有史以來最低，代表大部分嘅錢都係收響床下底唔用， 咁表示乜嘢？表示大家都知道金融世界末日即將來臨，唔敢使錢，所以印幾多銀紙都係擺，買晒負回報嘅債券，就等爆煲後的資產大跌價。當大跌價出現，銀紙就會撲出嚟買資產，因為到時大家都知最唔值錢嘅就係錢。你會見到嘅現象係，資產價格急跌後又快速掉頭回升，跟住就係經濟學家最擔心嘅滯脹時代，經濟衰退而物價因銀紙太多而上升。你睇吓委內瑞拉就知，全球石油存量最多，但該國係超級通貨膨脹，物資短缺，民不聊生，擁有全世界最靚嘅女仔又如何。

你唔可以阻擋金融危機嘅來臨，但你要阻止自己被打落地獄。借平錢要控制喺舒服程度，唔好用債務嚟堆砌富貴。留多個錢喺身邊，等自己有多啲子彈，喺危機之後，去掠奪仲窮過你嘅人。