恐懼之外另一值得恐懼 - 方卓如

2016年4月6日 - 信報

今年股市嘅主題必定係債轉股，據說有成萬億嘅債務有待轉成股票，咁大規模，股市想唔嚇到跌都難。債轉股，究竟係好事定壞事？

答案視乎你係乜嘢身份。如果你係內銀，唔使講梗係十分悽慘。你以為債轉股可以幫到內銀消除壞賬，免於虧損？錯。要撇除壞賬，令賬面虧損是必然的。但係壞賬變成壞投資，埋單計數一樣都係虧損，只不過輸少啲，一個輸足十成，另一個可能輸七成。一手債仔嘅股票，難保佢價錢唔會跌到殘，年結嘅時候一樣係輸錢。

腦筋急轉彎嘅你可能叻唔切，即時反駁：「唓，內銀變成大股東，其他股東攤薄晒，都冇人有貨沽。內銀自己唔沽，街又冇人沽，股價唔跌，內銀賬面唔會蝕，你呢個白癡唔識嘢，都唔使叫你同我去銅鑼灣數吉舖。」內銀唔會沽係啱，弊在內銀都唔會托。大時代嘅後遺症係，冇業績支持嘅公司，冇人出錢托，股價就不能抵抗地心吸力。

患絕症走去吊鹽水

債轉股，連原有大股東都攤薄埋，無人駕駛，股價缺乏動力。內銀首先由債主變成股東，失去了利息收入；繼而手上股票跌價，變成賬面虧損；萬一債仔供股集資，內銀又唔見一筆。思前想後，債轉股只係將內銀嘅煩惱延長，本來絕症得番3個月命，而家要你吊鹽水吊足3年死唔去。

債轉股明明係好多呆壞賬處理嘅手法，點解今次唔得？原因係通常債轉股都有個白武士，銀行肯變成股東，就係博白武士有本事化腐朽為神奇，唔使渣都冇。如果冇白武士出現，銀行點會肯做股東，一定清盤，執得幾多得幾多。而家大規模債轉股有冇白武士？有，就係中國嘅股民。債轉股只係第一步，第二步係要股民肯畀錢參與買股票，銀行先有機會將股票變鈔票。否則，手上投資嘅公司終極命運都係清盤。要股民肯做白武士，先決條件係股市一定要好，令大家認為有得博，買入股票可以有錢賺。換言之，如果債轉股係一套有部署嘅策略，一萬億嘅債轉換股票嘅同時，股市必然要𣈱旺，否則轉為股票之後都係死路一條。有咁嘅想法，債轉股嘅時代，應該係炒市唔炒股，個別有份參與債轉股嘅公司，無論係債主定債仔，股價都唔會有表現。反而，其他冇債轉股成分嘅股票就十分熱烈，帶動市場氣氛，造就債轉股大功告成。

戲本應該係咁寫，但係經歷過大時代，領教過阿爺對調控股市嘅能力，其實同一套50萬預算，由五個無名無姓嘅後生仔拍套最佳電影差唔多，好多前輩都覺得唔係實至名歸，純粹被政治騎劫。亦即係話，債轉股係繼恐懼之外，另一樣值得年輕編劇恐懼。