復活節後即刻復活 - 方卓如

2016年3月29日 - 信報

復活節同聖誕節嘅分別係，聖誕節之後要好耐先人齊上力做嘢，但係復活節就節如其名，一放完假就即刻全世界復活，上力搏殺。上年復活節之後就係大時代嘅開始，今年相信唔會有咁猛嘅威力，但亦唔好睇小跌完落底之後嘅反彈能力。我講過，好多人係靠股市搵食，個市靜得太耐，會餓死好多人。香港人由細到大，畀人灌輸買股票先可以發達，唔買股票遲早餓死。人有基本求生能力，點會咁易餓死？所以股市可以有升跌，但一定唔會長期一沉不起，早晚都會翻生。

營造活潑股市去存貨

危機唔爆就冇危機，之前歐債危機已經示範過一次。而家歐洲國家冇債喇咩？還晒錢咩？仲窮過幾年前，印得更多銀紙。

但係歐洲股市冇話一跌到底，亦冇話喺低位橫行、死氣沉沉，照樣喺危機之中有得炒。中國嘅危機梗係唔會突然間消失，但同歐債危機一樣，唔爆就冇事，可以繼續炒股票。

而家中國用緊債轉股嘅方法去槓桿，為企業減債。內銀揸住成手股票，唯一出路就係要轉畀市民大眾，吸收連總理都話數額龐大嘅民間儲蓄。要在市場上將股票轉畀市民，首先就要搞旺市場，令市場活潑，令人覺得股市有錢賺，肯入市。好多人有錯覺，以為要有大時代嘅氣勢，股市先至旺場。但係大時代輸錢嘅人比贏錢嘅人仲多，而且係瞓身式輸錢，再嚟一次大時代都冇人跟。

反而逐少逐少的上落市，升啲又跌啲，引人入市之後又升番啲，有升有跌先會引起人嘅貪念，而持續不滅嘅貪念，先有足夠嘅購買力，引導社會嘅儲蓄流入股市，食晒內銀債轉股嘅股票，內銀咁先可以去存貨。

而家債轉股先至係啱啱開始，唔會咁快完，轉股之後仲要在市場上散貨，咁即係話，中國要危機唔爆發，就要維持一個活潑嘅股市。復活節之後，睇嚟你有運行。