買中都冇運行 - 方卓如

2016年3月30日 - 信報

安邦同Marriott爭Starwood，一如所料，提價、 現金加碼。用銀彈而唔使用公仔紙，好難同佢鬥，況且Marriott都係上市公司，買嘢要講synergy，出價要合理，否則自己股東都唔會肯應承。安邦係私人公司，老細說了算，本業又唔係做酒店，毋須要任何synergy。

安邦買咗之後，現有老外高層九成九會留任，仲會重賞，務求大家給力賺大錢，合理化安邦出嘅高價。有人打本畀你，買走晒嘈喧巴閉嘅股東，仲會加你人工留住你，呢啲百年一遇嘅筍工，Starwood嘅高層唔瞓身建議都對唔住列祖列宗。寫包單，安邦一定買得成Starwood，遲早安邦亦都會變成香港上市公司，快啲儲定錢等買股票。

瘋狂購物嘅後果將會係泡沫爆破，全世界都試過，冇乜邊處地方未嘗過泡沫爆破，除咗中國。中國到目前仲係年年火箭上升，之前什麼A股由高位下跌橫行多年，濕濕碎，唔算係乜嘢爆破。下一輪如果有大鑊嘢發生，鬼佬落注買中國。但係佢哋唔知道，中國最厲害嘅係藏富於民。

老外低估中央實力

美國嘅有錢人的確好有錢，佢哋嘅財富真正係自己，政府要打主意，惟有加稅，打擊逃稅，要抽取民脂民膏，一啲都冇效率。中國唔同，藏富於民在於國家嘅財富真正收藏民間，必要時可以一聲令下徵用，例如要券商入市買貨，規定畀買唔畀沽，沽貨嘅公安上門拉人。要動用民間資本，如臂使指，毫無難度。要中國爆煲，除非13億人全部都冇錢。鬼佬淨係識計政府有幾多外滙，嚴重低估中國政府嘅實力。再者，老外應該知道，連中國都爆煲，全世界都唔會有運行，佢哋贏嘅錢都會變廢紙。結論係，買中中國爆煲，你都冇運行，倒不如掉轉頭買中國唔爆，全世界繼續喺爆破邊緣繼續搵錢，你仲容易賺錢。

今年話咁快就過咗四分一，4月先係見真章，究竟市場跌咗落底未，還是仲要向下殺多一浸， 唔使急，好快開估。