中環返工唔一定係中環人 - 方卓如

2015年12月17日 - 信報

而家夜晚揸車尤其是電單車要特別小心，多咗大陸人有香港車牌揸香港車，佢哋當正呢度係大陸，紅燈冇車就可以轉彎，明明你綠燈直行都要閃避。嬲？千祈唔好，全世界都想食肥肉嘛，唔通你想食齋乎？中環人最近俾人話無奈，叫人嘖嘖稱奇。中環如果係地理位置嘅意思，我明白，的確有機會感到無奈。你本來搵份工，點知公司地址喺中環，地理上你都可以叫做中環人，咁所有香港人可以出現嘅無奈，例如加班勁多、人工勁少、無乜前途……諸如此類，中環人梗有。

但如果中環係一款工種或價值觀嘅代表，咁你話有無奈就真係好難明白。中環作為一種價值觀，中環人係啲乜嘢人？應該係不停動腦筋點樣生存，唔放過任何機會，而機會唔係天跌落嚟，係你見到任何蛛絲馬跡，立刻度橋點樣轉化成機會。中環人未必會一帆風順，打工隨時俾人炒幾次，做生意隨時俾人呃幾鑊，但係次次都可以搵得番份工，鑊鑊都可以企得番起身。中環人可以喺中環生存到，去到邊度都唔會餓死。

唔認命　靠雙手打天下

無奈？中環人點會有時間無奈？佢發覺唔對路嘅時候，已經搵緊第二條路走。無奈嘅前提係認命，你認命，覺得無能為力時不我與，先會無奈。中環人點會認命？打入去中環，就係因為唔認命，要靠自己雙手打天下。到你打到周身傷痕，始終無功而還，到時你會退出中環，另外找尋一片天地，到時你已經唔係中環人，到時你可以無奈。

其實有好多喺中環返工但心態一啲都唔中環嘅人；中環有唔少報紙檔，地理上佢哋都係中環人，但佢哋唔會周圍叫自己做中環人。餘此類推，好多返寫字樓、讀過書、律師會計師銀行家，只不過碰巧在中環返工，心態價值觀一啲都唔中環。換了辦公室在觀塘，佢哋做嘅嘢都係一模一樣，同樣地無奈，只不過唔會叫觀塘人的無奈咁無型無款。