邊個得閒邊個做 - 方卓如

2015年11月2日 - 信報

今年萬聖節真係引出了妖魔鬼怪，全程網上真實轉播先至最恐怖。咁天打雷劈嘅忤逆事件，隨時畀人申請禁制令要網上下架。

近年out嘅身份或職位係乜嘢？係企管人。如果有人問你做盛行，你千祈唔好話自己做企管。否則，你即係話畀人知，你喺公司冇乜作用，你老細隨時要你又得唔要你又得。而你畀人炒咗，公司亦唔會有乜損傷，仲分分鐘好過你坐鎮嘅時候。

企管人可有可無

點解咁講？近幾年完全冇一個企業舵手可以交出成績，幫企業起死回生、發揚光大。以前，專業企管人係一種學問，退休後可以著書立說。Jack Welch、Lou Gerstner、Carlos Ghosn，上世紀係活生生嘅教材，你空降去任何一間半死不活嘅企業，有本事嘅係可以扭轉乾坤。今時今日，冇呢支歌仔唱，企業唔掂，唯一救到公司嘅係創辦人。蘋果、Starbucks、Dell，甚至聯想（00992），當企業走下坡，要創辦人出山撥亂反正。香港更加唔使講，從來都冇專業企管人呢個實位存在，虛位一個。CEO辭職，接任嘅可以係大股東個女，或大股東個親戚。上市公司CEO，邊個得閒邊個做。

正面嚟睇，而家世界變得太快，唔係一個讀完書滿肚理論嘅人可以駕馭。而家最紅嘅企業話事人，全部都係創辦人，佢哋唔只係icon，仲係成間公司行邊個方向嘅話事人。而家做execution唔值錢，諗到做乜嘢execution先最值租。企管人係醫生，專係幫公司診症，但係而家公司已經唔係有病要醫，係死咗之後要搵處好人家投胎托世。創辦人習慣死過翻生，一直都喺裂縫中搵機會，佢哋先有本事幫企業搵新出路。專業企管人成世打工，從來係執頭執尾嘅高手，唔係破舊立新嘅材料。

最新例子係車路士。《金融時報》都有專欄分析車路士究竟搞乜鬼，由上屆冠軍搞到而家接近護級。原班人馬，夾慣夾熟，點解完全唔同？連《金》都唔知，摩連奴係接手新球隊先有聲有色，佢之前在波圖紅咗，即刻被車路士挖角，未有機會現形。車路士、國米、皇馬，一空降，畀佢執幾執，攞冠軍，但係冠軍球隊，佢未試過可以維持下去，建立王朝。佢係最科學化嘅企管人，專執爛攤子，搞到同以前唔同晒，但係好人好姐要再創高峰，佢唔在行。開定盤，估吓邊個得閒，接手車路士。