兩邊紮行馬等開估 - 方卓如

2015年9月17日 - 信報

萬眾期待，美國加息與否明日凌晨就揭盅，你不能不佩服阿爺嘅本事，係佢打亂咗聯儲局究竟加定唔加。如果冇A股崩盤同人民幣貶值，市場就唔使估佢加定唔加，就唔會有而家兩邊陣營紮行馬等開估，賭佢加定唔加嘅張力。

但係如果你相信市場是有效率的，你就會知道，最緊要唔係明早加息定唔加息，因為今次唔加，總有一日加，這個加息預期一定會在市場反映。一日有這個預期，市場都唔會開心哋上升。市場最想要嘅，係消除猜度。

消除猜度最緊要

明早如果加息係表明利率正常化宣布開始，呢個過程嘅啟動先至最致命。如果加息在大市暢旺時，你反而唔知應該買上定買落。而家加息在大市虛弱時，明早加定唔加，大市都係要終極一跌，先有持續上升嘅動力。

當大家講大市點點點，會有乜嘢反應，好似講到大市係隻外星嚟嘅怪獸，佢嘅脾性冇人知。但係大市係由一班投資者組成，大市只係反映佢哋唔同行動嘅總和。

只有躲埋一二角暗中做嘢嘅投資者我哋唔知道，其他大多數嘅投資者有乜諗法，喺今日咁透明嘅世界係無所遁形。你係會感應到市場氣氛如何，市場往何處走向。

當然，投資者有好多層次，最勁最有錢嗰班，最醒目，做嘢唔係咁多人知。佢哋最會喺大家仲係恐懼緊嘅時候，最夠膽先入市撈貨。你唔係佢哋，資訊冇佢哋咁發達，你一定做唔到最底撈貨嘅醒目仔行為。你可以做嘅，風險高啲嘅，係喺市場習慣恐懼、開始貪婪後進場；安全啲嘅，係喺市場開始貪婪後入場賺浸快錢，唔好貪到盡。

最慳工夫嘅，如果你大把零用錢嘅，唔使煩，揀幾隻年年派息嘅，𥄫實佢，每逢價錢去到你舒服嘅位置就買，唔理佢升定跌。如果係呢個方法嘅話，你都唔使點睇大市，加唔加息，反正你日日𥄫實嘅，價錢你最熟，你舒服嘅價錢唔會死錯人，揸佢三五七年，一定可以畀你等到價位可以走人。