德國人都出貓 - 方卓如

2015年9月23日 - 信報

福士車廠股價大跌兩成，原因係柴油車在美國驗車時出貓，驗車時排放合格，出街行就打回原形，排放超標。點解架車會知道自己俾人測試緊、識得出貓？出貓唔需要高科技，因為測試時，前輪不停轉，後輪就靜止唔轉。咁嘅情況，係任何有安全設備嘅車輛唔容許出現嘅危險情況，所以車輛要有個test mode，容忍呢種前後輪唔協調嘅情況發生。柴油車排放氧氮，係溫室氣體，需要尿素去中和。Test mode嘅時候注入多啲尿素，測試自然過關。福士唔需要出動一些高科技技術，唔需要傷腦筋就可以出貓。問題係，點解德國人都會出貓？

認真便輸了乃大勢

福士行政總裁介紹新車時候主動道歉，話佢哋唔誠實，搞到一鑊泡。德國人出名嚴謹認真，造假來自德國最大車廠，匪夷所思，代表呢個世界已經冇嘢再係信心保證。「認真」再冇市場嘅時候，市場唔注重質素嘅潮流，大家惟有鬥快搶錢，唔出事就得。「認真」冇市場係骨牌效應，日本都係公認認真嘅國家，多年前頂級懷石料理、米芝蓮三星餐館「吉兆」，被指食物循環再用。當世界唔再注重認真細節，認真便輸了。

唔好怪福士，認真便輸了是大勢所趨。唔使睇到美國咁遠，你睇吓香港。講一句地位超然，再一句去殖民化，成個城市疲於奔命，一邊撲出嚟解畫，一邊撲去嚟駁斥。幾日之後，城市又如常運作，忘記了這幾段聽完講完等於冇嘢發生嘅說話。再早一點，一個連名都已經唔記得嘅市民，說一句要消滅電車，整個城市又係撲出來群毆，毆完之後又係冇事發生過。攞支電筒往地下亂照，小貓小狗就會發狂追玩光點。熄咗電筒，小貓小狗又會回復平常，俯伏睡覺。

認真便輸了，你對當你小貓小狗嘅事情咁認真，好易學似福士行政總裁所講，搞到一鑊泡。